Mehdiabad qəsəbəsinin sakinləri "Azərişıq"ın fəaliyyətindən narazıdır – Elektrik problemi davam edir

Abşeron rayonunun Mehdiabad qəsəbəsi, Hüseyn Arif 15 küçəsində yaşayan sakinlər “Azərişıq” ASC-nin fəaliyyətindən narazılıq edirlər.

Mehdiabad qəsəbəsi, Hüseyn Arif 15 küçəsində yaşayan sakinlərin sözlərinə görə, avqustun 2-dən bu günədək dəfələrlə edilən müraciətlərə baxmayaraq, əraziyə verilən elektrik enerjisi hələ də stabil deyil.

Sakinlərin iddiasına görə, bir neçə gündür işıqların sönməsi və gərginliyin tez-tez dəyişməsi nəticəsində evlərindəki bir çox elektrik avadanlığı sıradan çıxıb.

Onlar məsələ ilə bağlı “Azərişıq”a dəfələrlə 199- qaynar xəttə və online müraciət etsələr də, problem hələ də həll olunmayıb.

“Soyuducudan tutmuş televizora qədər bir neçə cihazımız yanıb. Müraciət edirik, deyirlər baxılacaq, amma illərdir eyni vəziyyətdir,” – deyə sakinlərdən biri bildirib.

Sakinlər "Azərişıq" rəhbərliyindən problemin köklü şəkildə həllini tələb edir və məsələ ictimailəşməyəcəyi təqdirdə müvafiq qurumlara kollektiv şikayətlə müraciət etməyi planlaşdırırlar.

Təmkin Abbaslı