Şahlar Quliyev adlı sakin isə AzToday.az-a açıqlamasında Ləzir meşələrinin məhv edilməsinin arxasında 11 saylı Regional Meşə Təsərrüfatı Mərkəzinin direktoru Nəsimi Nəsibov və direktor müavini Rahib Ağayevin dayandığını deyib: “Meşələr kütləvi şəkildə məhv edilir. Böyük bir sahədə ağaclar vəhşicəsinə qırılır. Hamısının arxasında 11 saylı Regional Meşə Təsərrüfatı Mərkəzinin rəhbərliyi dayanır. Əks təqdirdə kimsə, meşədən bir ağac belə kəsə bilməz. Təsəvvür edin, meşəbəyi işlədiyi zaman yol verdiyi nöqsanlara görə məhkəmə qərarı ilə işdən çıxarılmış Məhəmməd Adiyev Nəsimi Nəsibov yenidən başqa ad altında işə götürülüb. Hansı ki, o, Əmək Məcəlləsinin 70-ci maddəsinin “Ç” bəndi ilə işdən çıxarılmış Məhəmməd Adiyevin yenidən işə götürülməsi tam qanunsuzdur. İndi həmin Adiyevi Nəsimi Nəsibov Ləzir meşələrinə gözətçi təyin etmək üzrədir. Son meşə qırıntılarını da Məhəmməd Adiyev təşkil edib. Təbii ki, Nəsimi Nəsibovun bundan xəbəri var və yığılan pullar piramida şəklində rəhbər şəxslərə çatdırılıb”.
Şahlar Quliyevin fikrincə Ləzir meşələrinin hər bir qarışı yoxlanılmalıdır: “Bildiyim qədər son 1 həftədə 300-dən çox ağac məhv edilib. Onların da əksəriyyəti işlik material üçün kəsilib. Dünən kiçik bir ərazidə yoxlama aparılıb. Ümid edirəm yoxlama bütün qırıntıları əhatə edəcək. Nazir Muxtar Babayevdən xahiş edirəm ki, yoxlamaları yerli ekologiya idarələri deyil, nazirlikdən gələn əməkdaşlarla hüquq-mühafizə orqanları aparsın. Onda Nəsimi Nəsibov və müavini Rahib Ağayevin kiçik bir dolayda etdirdiyi ekoloji cinayətin üstü açılacaq”.
Sakinlər meşələrin kütləvi şəkildə məhv edilməsi fonunda ətraf kəndlərdə ekoloji fəsadların yarana biləcəyindən narahatdırlar.
Bundan başqa, “Ecofront” səhifəsi Yardımlı rayonunda meşələrin kütləvi şəkildə məhv edilməsi ilə bağlı görüntülər yayıb.
Qaynarinfo-nun məlumatına görə, bildirilir ki, 11 Saylı Regional Meşə Təsərrüfatı Mərkəzinin 1 saylı meşəbəyliyinin 2 saylı dolayında meşəni son bir neçə həftədə talan ediblər.
Məlumatda 100-lərlə ağacın qeyri-qanuni kəsildiyi qeyd edilir. Həmin dolay noyabrın əvvəlindən gözətçisiz qalıb. Bundan sonra ağac kəsilməsi daha da artıb.
Ağacların heç birinin isə damğası olmayıb. Kənd sakinlərdən biri deyib ki, dünən idarədən gəlib ağaclara damğa vurublar.
6 ay öncə isə yuxarıda adı keçən dolayda təhvil-təslim zamanı 200-ə yaxın ağaca damğa vurub, ancaq akt tərtib etməyiblər. Həmin dolayın bu özbaşınalığa tab gətirməyərək işdən çıxan gözətçisi belə deyib.
İndidə idarə həmin meşəyə işdən çıxarılan gözətçini gətirib məsələni ört-basdır etməyə çalışır.
Səhifə ağacların məhv edildiyi yerdən görüntülər də paylaşıb.
Ekologiya və Təbii Sərvətlər Nazirliyindən Qaynarinfo-ya bildirilib ki, yayılan görüntülərlə bağlı araşdırma gedir. Əldə etdiyimiz məlumata görə, eyni anda hüquq-mühafizə orqanları tərəfindən də sözügedən görüntülər araşdırılır.
