“Azərenerji” ASC-nin prezidenti Balababa Rzayevə şiddətli töhmət verilib.
Yeniavaz.com xəbər verir ki, Baş nazir Əli Əsədov bununla bağlı sərəncam imzalayıb.
Sərəncama əsasən, 2024-cü il üzrə təsdiq edilmiş yanacaq-enerji balansında qazdan istifadə istiqamətlərini pozaraq müvafiq qaydada razılaşdırmadan elektrik enerjisini ixrac etdiyinə görə, “Azərenerji” ASC-nin prezidenti Balababa Hüseynağa oğlu Rzayevə şiddətli töhmət elan edilib.
Bu sərəncam imzalandığı gündən qüvvəyə minir.
Qeyd edək ki, zaman-zaman “Azərenerji” ASC-nin prezidenti Balababa Hüseynağa oğlu Rzayevin adı mətbuatda dövlətin pulunu ailəsi üçün necə xərcləməsi barədə məlumatlar yayılıb.
Həmin məlumatlarda “Azərenerji” Açıq Səhmdar Cəmiyyətinin elan etdiyi tender müsabiqələrinin (açıq tender) qalibləri ailəsinni və ya yaxın qohumlarının şirkətləri olması bildirilib.
Bir müddət öncə media da, yayılan məlumatlarda bildirilirdi ki, “Azərenerji” ASC tərəfindən "Müxtəlif növ elektrik mallarının satın alınması" məqəsədilə keçirilən tender müsabiqəsinin qalibi "Electro Service" QSC (VÖEN – 1504224741) olub.
“Azərenerji” “Müxtəlif növ elektrik mallarının satın alınması" üçün "Electro Service" QSC-yə 4 milyon 209 min 465 manat 80 qəpik ödəycək.
Məlumat üçün bildirək ki, "Electro Service" QSC 08.10.2018-ci il tarixində dövlət qeydiyyatına alınıb. Nizamnamə kapitalı 2 min manat olan QSC-nin hüquqi ünvanı Bakı şəhəri Nərimanov rayonu Heydər Əliyev pr., ev 187B-də yerləşir. "Electro Service" QSC-nin qanuni təmsilçisi Babayev Tural Əli oğludur.
Maraqlı məqamlardan biri odur ki, dövlət qurumlarının keçirdiyi milyonluq tenderlərin qalibi olan "Electro Service" QSC barəsidən açıq internet resurslarda heç bir məlumat yoxdur. Şirkətin nə rəsmi saytı, nə də sosial şəbəkə hesabları var. 2018-ci ilin oktyabr ayında dövlət qeydiyyatına alınan şirkət cəmi 8-9 ay sonra “Azərişıq” ASC-nin keçirdiyi 787 min manatlıq tenderi udub. "Electro Service" QSC təkcə 2022-ci ildə 8 tender müsabiqəsində qalib olub.
Diqqət çəkən digər bir maraqlı məqam isə odur ki, "Electro Service" QSC dövlət qeydiyyatına alınan zaman şirkətin hüquqi ünvanı Nərimanov rayonu, Ziya Bünyadov, ev 2071-ci məhəllədə yerləşib. Şirkətin qanuni təmsilçisi isə Məmmədov Fuad Alxaz oğlu olub.
Qeyd edək ki, Nərimanov rayonu, Ziya Bünyadov, ev 2071-ci məhəllədə “Azərenerji” ASC-nin prezienti Balababa (Baba) Rzayevin ailə üzvlərinə məxsus şirkətlər yerləşir.
Məsələn, 1 mart 2016-cı il tarixində dövlət qeydiyyatına alınan və hüquqi ünvanı Ziya Bünyadov, ev 2071-ci məhəllədə yerləşən “Zirə Aqropark” MMC-nin (VÖEN – 1503134451) qanuni təmsilçisi Baba Rzayevin kürəkəni Fərid Fərhadzadə olub.
Fərid Fərhadzadə Fövqəladə Hallar Nazirliyi yanında Kiçikhəcmli Gəmilərə Nəzarət və Sularda Xilasetmə Dövlət Xidmətinin rəisi olan general-mayor Rüfət Fərhadovun oğludur. Baba Rzayevin kürəkəni mətbuatda "Göknur Bakı Ltd” MMC-nin (VÖEN - 1500023181) müdiri kimi təqdim olunur. Bu şirkətin qanuni təmsilçisi isə Baba Rzayevin qardaşı Rahib Rzayevdir.
Bundan başqa “Zirə Aqropark” MMC-nin qeydiyyatada olduğu hüquqi ünvanda – Ziya Bünyadov, ev 2071-ci məhəllədə “GBS” QSC adlı (VÖEN-1500855231) şirkət də yerləşir. Bu şirkətə məxsus obyektlər də Zirədəki zeytun zavodu ilə eyni ərazidədir. Həmçinin “GBS” adı ilə başlayan başqa bir şirkətə - “GBS Constrasion Electro Mechanical Systems” MMC-yə (VÖEN - 1501472741 ) Baba Rzayevin digər qardaşı Emin Rzayev rəhbərlik edir.
Ölkənin aparıcı şirkətlərindən biri olan “Santral Elektrik LTD” MMC-nin (VÖEN – 1500023051) yerləşdiyi ünvan kimi də Ziya Bünyadov, ev 2071-ci məhəllə göstərilib. Bu şirkətin qanuni təmsilçisi isə Baba Rzayevin qaynı Həsənov İlham Ağaməsim oğludur.
4,2 milyonluq tenderin qalibi olan “Electro Service" QSC-nin hazırki qanuni təmsilçisi Tural Babayevin kim olduğu bilinmir. Lakin, açıq internet resurslarda Zirə qəsəbəsinin sakini olan Tural Babayev adlı şəxsin “Santral Elektrik LTD” MMC-də işlədiyi qeyd olunub.
