Azərbaycanda şagirdlər arasında qızılca xəstəliyi yayıldıqdan sonra bəzi məktəblərdə tibb məntəqəsinin və tibb bacısının olmaması müzakirə mövzusuna çevrilib.
Xatırladaq ki, oktyabrda Bakı şəhər Qaradağ rayonunda yerləşən 195 saylı məktəbin 4-cü sinif şagirdi qızılcadan vəfat edib. Həmin məktəbin direktoru Laçın Hüseynli sosial şəbəkədə dəfələrlə məktəb üçün tibb işçisi tələb etdiklərini, lakin aidiyyəti qurumların bu məsələni həll etmədiklərindən şikayətlənib. O, üçnövbəli məktəbdə bir nəfər də olsun tibb işçisinin olmadığını qeyd edib.
Bu günlərdə jurnalistlər üçün keçirdiyi brifinqdə isə elm və təhsil naziri Emin Əmrullayev də hər məktəbdə tibbi kabinetin olmadığını söyləyib.
Bəs məktəblərdə tibbi kabinetlər təhsil müəssisələrinin müraciəti əsasında və hansı müddətə yaradılır? Bu tibb məntəqələrinin fəaliyyəti hansı durumdadır?
Məsələ ilə bağlı Tibbi Ərazi Bölmələrini İdarəetmə Birliyindən (TƏBİB) Bizim.media-nın sorğusuna cavab olaraq bildirilib ki, təhsilalanlara pulsuz tibbi xidmət təhsil müəssisəsi tərəfindən göstərilir:
“Azərbaycan Respublikasının Prezidenti İlham Əliyevin imzaladığı 19 iyun 2009-cu il tarixli Təhsil haqqında Azərbaycan Respublikasının Qanununun 28-ci Maddəsinin (“Təhsil müəssisəsində iaşə və tibb xidməti”) 28.3-cü bəndinə əsasən, “Təhsil müəssisəsində təhsilalanlara müvafiq icra hakimiyyəti orqanının müəyyən etdiyi qurumun müəyyən etdiyi qaydada pulsuz tibbi xidmət həmin təhsil müəssisələri tərəfindən göstərilir.
Həmçinin Azərbaycan Respublikası Nazirlər Kabinetinin 2010-cu il 25 noyabr tarixli 217nömrəli qərarı ilə təsdiq edilmiş “Təhsil müəssisəsində təhsilalanlara pulsuz tibbi xidmətin göstərilməsi” Qaydasına əsasən, “Bu qayda mülkiyyət formasından və tabeliyindən asılı olmayaraq, bütün təhsil müəssisələrinə şamil edilir və təhsil müəssisələrinin rəhbərləri bu qaydaya əməl edilməsinə görə məsuliyyət daşıyırlar.
Аzərbаycаn Rеspublikаsının Əmək Məcəlləsinin Əməyin Mühаfizəsi bölməsinin 34-cü fəslinin 215-ci mаddəsinə əsasən, müəssisələrin mülkiyyətçiləri və işəgötürənlərin həyata keçirdiyi bir sıra tədbirlər sırasına işçilərə lаzımi sаnitаriyа - məişət və müаlicə - prоfilаktik хidmətlərin təşkilini təmin etməsi də daxildir. Müəssisələrdə tibb məntəqələrinin yaradılması isə həmin müəssisələrin səlahiyyətləri çərçivəsindədir”.
Məlumatda təhsil müəssisələrində tibbi xidmətin təşkili prinsiplərinin Nazirlər Kabinetinin qərarına əsaslandığı öz əksini tapıb:
“Azərbaycan Respublikası “Təhsil haqqında” Qanuna əsasən, dövlət təhsil müəssisəsində ödənişsiz tibbi xidmətin təşkili qaydası Nazirlər Kabinetinin 2010-cu il 25 noyabr tarixli 218 nömrəli qərarı ilə təsdiq edilmiş “Təhsil müəssisələrində iaşənin və tibbi xidmətin təşkili Qaydası və Normaları” ilə tənzimlənir.
Bu qaydalara əsasən, mülkiyyət formasından və tabeliyindən asılı olmayaraq, bütün təhsil müəssisələrində təhsilalanlar TƏBİB tabeliyində fəaliyyət göstərən ərazi və ya tələbə poliklinikaları tərəfindən tibb xidməti ilə təmin edilirlər.
Təhsil müəssisələrində təhsilalanların tibbi xidmətlə təmini iki formada həyata keçirilir:
“Təhsil müəssisəsində ambulator tibb xidmətinin təşkili üçün yaradılmış həkim və ya tibb məntəqəsi (məktəb həkim-pediatrı və ya tibb bacısı tərəfindən) və ümumi qaydada, yəni yerində ambulator tibbi xidmət təşkil edilmədən (sahə üzrə təhkim edilmiş sahə həkimi-pediatr (ailə həkimi) və ya tibb bacısı tərəfindən…”
Qeyd edilib ki, ambulator tibb xidmətinin təşkili üçün təhsil müəssisəsində yaradılmış həkim və ya tibb məntəqəsinə həkimin, eləcə də tibb bacısının birdəfəlik təhkim edilməsi üçün bu müəssisədə təhsil alan uşaq sayı və ərazi üzrə tibb müəssisələrinin ştatları nəzərə alınır.
“Yoluxucu xəstəliklərə qarşı immunoprofilaktikası və uşaqların icbari dispanserizasiyası üzrə cavabdehlik uşağın hansı təhsil müəssisəsində təhsil almasından asılı olmayaraq məktəb həkim-pediatrı ilə yanaşı ərazi üzrə təhkim olunduğu həkim-pediatrın cavabdehliyindədir”, - deyə məlumatda vurğulanıb.
