Səbail Rayon Mənzil Kommunal-Təsərrüfatı Birliyinin rəisi Elçin Həsənovun ölkədən çıxışı məhdudlaşdırılıb.
Qaynarinfo.az xəbər verir ki, bununla bağlı Bakı Kommersiya Məhkəməsinin hakimi Aytən Əliyeva 10 avqust 2023-cü il tarxidə qətnamə çıxarıb.
İşin detallarına gəlincə, Səbail Rayon Mənzil-Kommunal Təsərrüfatı Birliyinin 85 125,53 manat vergi borcu olub. Qurum borcu ödəmədiyinə görə, İqtisadiyyat Nazirliyi yanında Dövlət Vergi Xidməti Bakı şəhəri Lokal Gəlirlər Baş İdarəsi xüsusi icraat qaydasında ərizə ilə məhkəməyə müraciət edib. Hakim ərizəni təmin edərək borcun tam ödənilədək Elçin Həsənovun ölkədən çıxışının məhdudlaşdırılması barədə qətnamə çıxarıb.
Araşdırmalarımız zamanı məlum olub ki, hazırda Birliyin 286 030,17 manat vergi borcu var.
Səbail rayon Mənzil-Kommunal Təsərrüfatı Birliyi Bakı Şəhər İcra Hakimiyyəti başçısının 9 fevral 1996-cı il tarixli, 200 saylı sərəncamı və Səbail Rayon İcra Hakimiyyəti başçısının 17 fevral 1996-cı il tarixli, 316 saylı sərəncamına əsasən yaradılıb.
Birlik tabeliyində 8 Mənzil-Kommunal İstismar Sahəsi, Nəqliyyat Sahəsi və Qəza xidməti sahəsinin rəhbərlik orqanı kimi, hüquqi şəxs hüquqlarından istifadə edir, müstəqil balansa, bank hesablarına və digər hesablara malik olub, qismən büdcədən maliyyələşdirilməklə, təsərrüfat hesabı əsasında fəaliyyət göstərir, öz işində Bakı şəhər Mənzil-Kommunal Təsərrüfatı Departamentinə və Səbail Rayon İcra Hakimiyyətinə tabedir.
