Məlum olduğu kimi, Azərbaycanda pensiya ala bilmək üçün insanlar işlədikləri müddət ərzində Dövlət Sosial Müdafiə Fonduna (DSMF) icbari ödənişlər edirlər.
Yeniavaz.com xəbər verir ki, kişilər 65 yaşları tamam olduqdan sonra etdikləri bu ödənişləri pensiya formasında geri almağa başlayırlar.
Bəs görəsən, vətəndaşlar yaşadıqları müddət ərzində DSMF-yə nə qədər vəsait ödəyirlər və nə qədər pensiya alırlar?
Açıqlanan son rəsmi məlumatlara görə, Azərbaycanda orta aylıq əmək haqqı 829 manat, orta aylıq pensiya məbləği isə 368 manata bərabərdir.
Azərbaycanda insanların gözlənilən ömür müddəti isə 73,6 ilə bərabərdir.
Belə olan halda, hazırkı göstəricilərə görə bir insan 22 yaşından (Ali təhsil aldıqdan sonra) başlayaraq 65 yaşına kimi (Pensiya yaşı) DSMF-yə ümumilikdə orta hesabla 41 min 796 manat ödəniş etməlidir.
Bildiyimiz kimi, hazırda əmək haqqının 200 manata qədər olan hissəsi üçün 3%-i, 200 manatdan yuxarı olan hissəsi üçün isə 10% + 6 manat miqdarında icbari ödəniş edilir.
Pensiyaya çıxdıqdan sonra bir insan orta hesabla 8,6 il (102 ay) yaşayacağı (Orta ömür 73,6 ildir) üçün ümumilikdə orta hesabla 37 min 536 manat (102*368) pensiya ala biləcək.
Rəqəmlərdən də göründüyü kimi, açıqlanan rəsmi statistik göstəricilərə əsasən hesablama apardığımız zaman insanların DSMF-yə alacaqları pensiyadan daha çox (4 min 260 manat) vəsait ödədiyi görülür.
