Sosial şəbəkələrdə özünü şairə kimi təqdim edən İlhamə Əskərovanın (Elşadqızı) cinayət işi üzrə növbəti məhkəmə prosesi keçirilib.
MillətinSəsi.İnfo xəbər verir ki, Bakı Ağır Cinayətlər Məhkəməsinin hakimi Anar Sadıxovun sədrliyi ilə keçirilən prosesdə təqsirləndirilən şəxsin saxlanılmasında iştirak edən polis əməkdaşları ifadə verərək İlhamə Əskərovanın mənzilində narkotik maddənin aşkar olunduğunu bildirib, buna görə də videoçəkiliş aparılaraq istintaqa təhvil verildiyini deyiblər.
İ.Əskərova əməliyyatçıların mənzildə axtarış apardıqları zaman anasının da orada olduğunu desə də, əməliyyatçılar bunu təkzib ediblər.
Özünü təqsirli bilməyən İ.Elşadqızı hesab edir ki, azadlıqda olması cəmiyyət üçün daha faydalı olar: “Bu gün müqəddəratım həll olunur. Əziyyət çəkib bu qədər əsərlər yazmışam. Mən sıradan bir adam deyiləm. Mən jurnalistəm, narkotik çəkən deyiləm. Tərtəmizəm, gül kimi də qızam”.
Bununla yanaşı, mənzilindən 200 manatının yoxa çıxdığını iddia edən tiktoker bunun axtarış zamanı baş verdiyini desə də, ifadə verən polis əməkdaşları bunu onlara atılan iftira kimi qiymətləndiriblər.
Əməliyyatçı prokurorun suallarını cavablandıraraq İ.Əskərovanın mənzilində tapılan narkotik maddənin paltar dolabındakı əl çantasının içində aşkar olunduğunu deyib.
Tiktoker ifadəsi zamanı məhkəmədən barəsində açılmış cinayət işinin obyektiv araşdırılmasını istəyib.
Xatırladaq ki, İlhamə Əskərovaya qarşı Cinayət Məcəlləsinin 234.1-1 (Satış məqsədi olmadan külli miqdarda qanunsuz narkotik vasitələr və ya psixotrop maddələri saxlama və ya daşıma) maddəsi üzrə ittiham irəli sürülüb.
Qeyd edək ki, "TikTok" əməliyyatları çərçivəsində aparıcı Azər Zahid, Emin və Rəşad Abdullayev qardaşları və digərləri saxlanılıblar. Onların barəsində həbs qərarı çıxarılıb.
İlhamə Elşadqızı aparıcı Azər Zahid tərəfindən tiktokerlərin iştirakı ilə təşkil olunan yarışlarda iştirakçı olub.
Azərbaycan dili
Русский
Deutsch
English
Türkçe
Français