İlk dəfə səs verəcək seçicilər üçün xüsusi seçici kartları hazırlanıb.
"Report" xəbər verir ki, bunu Mərkəzi Seçki Komissiyasının (MSK) bu gün keçirilən iclasında MSK sədrinin müavini Rövzət Qasımov deyib.
O qeyd edib ki, ilk dəfə səs verəcək 374 seçici sentyabrın 1-də doğum gününü qeyd edəcək: "Onlara da xüsusi doğum günü kartları veriləcək".
R.Qasımov əlavə edib ki, görmə məhdudiyyətli seçicilər üçün xüsusi trafaretlər çap edilib və məntəqələrə paylanılıb.
MSK sədri Məzahir Pənahov isə öz növbəsində təklif edib ki, həmin kartlara MSK-nın xüsusi möhürü vurula bilər:
"Bu, doğum günü kartlarının MSK-dan verildiyini xüsusiləşdirə bilər. Gərək bunu prezident seçkilərində də edərdik".
Bundan başqa, Mərkəzi Seçki Komissiyasının sədri Məzahir Pənahov sentyabrın 1-də keçiriləcək növbədənkənar parlament seçkilərinin nəticələrinin nə zaman açıqlanacağı barədə məlumat verib.
M. Pənahov bildirib ki, səsvermə günü ilkin nəticələri operativ verməyə çalışırlar: “Bu seçkilərdə də çalışacağıq ki, ilkin nəticələri həmin gecə çatdıraq. Bu ilkin nəticələr olacaq, yekun deyil. İki gün ərzində dairələrdən protokollar bizə veriləcək”.
