İmişli rayon İcra Hakimiyyətinin başçısı Elçin Rzayevin Muradxanlı kəndində keçirilən qəbulundan sonra iştirakçılardan (yerli sakin - red.) biri saxlanılıb.
Həmin şəxs kəndin 1961-ci il təvəllüdlü sakinidir və fermerdir.
İkinci dərəcəli əlil olan həmin şəxs Elçin Rzayev çıxış edərkən xəstəliyinə görə onu eşitmədiyi üçün mikrofonla danışmasını tələb edib. Bundan sonra icra başçısının göstərişilə fermer ön sırada əyləşdirilib və sonadək iclasda iştirak edib.
İclas başa çatandan sonra İmişli rayon Su kanal İdarəsinin direktoru Dəyanət Kazımov fermerə etdiyi hərəkətə görə etiraz bildirib.
Qəbulda iştirak etmiş 1961-ci il təvəllüdlü fermer İmişli rayon Su kanal İdarəsinin direktoru Dəyanət Kazımovun onu hədələdiyini iddia edib.
Fermer bildirib ki, idarə direktoru ona məxsus torpaq sahəsinə su verilişini təmin edən boruları çıxararaq suyun verilməsini dayandıracağını bildirib.
Bu səbəbdən o, idarə rəisi ilə mübahisə edib və müvafiq şikayət əsasında saxlanılıb. Fermerə İnzibati Xətalar Məcəlləsinin 510 maddəsi ilə protokol tərtib edilib və iş məhkəməyə göndərilib.
Məhkəmənin qərarı ilə rayon sakini İXM-nin 510-cu maddəsində nəzərdə tutulmuş inzibati xəta hadisəsinin törədilməsində təqsirli bilinib, 100 manat cərimə edilib.
Qeyd edək ki, 18.04.2024-cü il tarixdə qrafikə uyğun olaraq İmişli Rayon İcra Hakimiyyətinin başçısı Elçin Rzayev tərəfindən rayonun Muradxanlı kənd sakinləri ilə növbəti səyyar qəbul-görüş keçirilib. Səyyar qəbulda icra başçısı ilə yanaşı, rayonun əlaqədar xidmət təşkilatlarının rəhbər işçiləri də iştirak ediblər.
“Rayonun Muradxanlı kəndində təşkil olunan görüş zamanı bir neçə kənd sakini qəbulun formatına və mahiyyətinə uyğun olmayan ifadələr işlədərək qeyri-etik davranışlar nümayiş etdiriblər. Bundan sonra sözügedən şəxslər səyyar görüş təşkil olunan məktəb binasını tərk ediblər və qəbul bitdikdən sonra yenidən məktəbin ərazisinə qayıdaraq müəssisə rəhbərləri haqqında nalayiq sözlər işlədib onları təhqir ediblər. Sonra həmin şəxslər mübahisəni münaqişəyə çevirməyə çalışıblar. Bu səbəbdən onlar barəsində Azərbaycan Respublikası İnzibati Xətalar Məcəlləsinin müvafiq maddəsinə uyğun tədbir görülməsi üçün müəssisə rəhbərləri tərəfindən rayonun hüquq-mühafizə orqanlarına müraciət olunub”.
Qeyd edək ki, fermer müvafiq şikayət əsasında saxlanılıb. Fermerə İnzibati Xətalar Məcəlləsinin 510-cu maddəsi ilə protokol tərtib edilib və iş məhkəməyə göndərilib. Məhkəmənin qərarı ilə rayon sakini İXM-nin 510-cu maddəsində nəzərdə tutulmuş inzibati xəta hadisəsinin törədilməsində təqsirli bilinərək 100 manat cərimə edilib.
