Bu ilin əvvəlinə olan məlumata görə Dövlət Sosial Müdafiə Fondunda (DSMF) 1 milyon 200 pensiyaçı qeydiyyatda olub.
Yeniavaz.com açıqlanan rəsmi məlumatlara istinadən bildirir ki, pensiyaçıların 58,9%-ni və ya 707 min nəfərini yaşa görə pensiya alanlar təşkil edib.
Məlumat üçün bildirək ki, son bir ildə yaşa görə pensiya alanların sayı 1,3% və ya 9,3 min nəfər azalıb.
Son 13 il ərzində yaşa görə pensiya alanların sayı 15% və ya 129 min nəfər azalıb. Bu dövr ərzində Azərbaycan əhalisinin sayı 13% və ya 1 milyon 159 min nəfər artıb. Nəticədə, 13 il əvvəl yaşa görə pensiya alanlar ümumi əhalinin 9,5%-ni təşkil edirdisə, bu ilin əvvəlində bu göstərici 6,9%-ə kimi geriləyib.
Son 13 ildə əhalinin və yaşa görə pensiya alanların sayı bu cür olub:
| İllər | Əhalinin sayı | Pensiya alanların sayı |
| 2010 | 8 997,6 min nəfər | 858,6 min nəfər |
| 2011 | 9 111,1 min nəfər | 831,1 min nəfər |
| 2012 | 9 235,1 min nəfər | 812,7 min nəfər |
| 2013 | 9 356,5 min nəfər | 800,5 min nəfər |
| 2014 | 9 477,1 min nəfər | 791,3 min nəfər |
| 2015 | 9 593,0 min nəfər | 785,1 min nəfər |
| 2016 | 9 705,6 min nəfər | 781,2 min nəfər |
| 2017 | 9 810,0 min nəfər | 781,9 min nəfər |
| 2018 | 9 898,1 min nəfər | 778,1 min nəfər |
| 2019 | 9 981,5 min nəfər | 756,1 min nəfər |
| 2020 | 10 067,1 min nəfər | 742,0 min nəfər |
| 2021 | 10 119,1 min nəfər | 716,2 min nəfər |
| 2022 | 10 156,4 min nəfər | 707,1 min nəfər |
Qeyd edək ki, pensiya alanların sayının azalması ölkədə pensiya yaşının artırılması ilə bağlıdır. 2010-cu ildə Azərbaycanda kişilər 60, qadınlar isə 57 yaşında pensiyaya çıxdıqları halda, hazırda kişilər 65, qadınlar isə 62,5 yaşında pensiyaya çıxırlar.
