“Gecə-gündüz çalışan komandamız olmasa idi, bu qədər uğurlu “TEKNOFEST” təşkil edə bilməzdik”.
“Report” xəbər verir ki, bunu “Bayraktar” pilotsuz uçuş aparatının (PUA) yaradıcısı Səlcuq Bayraktar “TEKNOFEST Azərbaycan” Festivalında çıxışı zamanı deyib.
“Nobel mükafatı laureatı Əziz Səncərə da təşəkkür edirəm. Azərbaycanlı bacı və qardaşlarımıza “TEKNOFEST”də iştirak etdiyinə görə minnətdaram. Prezident İlham Əliyev və Prezident Rəcəb Tayyib Ərdoğan başda olmaqla dəstəyini əsirgəməyən hər kəsə minnətdaram. Azərbaycanın Müstəqillik Günü mübarək olsun. Eşq olsun Azərbaycana”, - o söyləyib.
Sonda Bakıda keçirilən “TEKNOFEST Azərbaycan” Aerokosmik və Texnologiya Festivalı çərçivəsində təşkil olunmuş “Cansat Model Peyk” və “Pilotsuz Uçuş Aparatları” yarışlarının qaliblərinə mükafatlar verilib.
“Cansat Model Peyk” yarışı üzrə qalib hazırladığı peyk modelini uğurla səmaya buraxan Bakı Ali Neft Məktəbinin “İstiqlal” komandası olub.
“Pilotsuz Uçuş Aparatları” yarışı üzrə qalib isə sərbəst missiyasını dizayn etdikləri dronlarla havaya qaldıran Milli Aviasiya Akademiyasının “MockingJay” komandası elan edilib.
