Xocalıda minaya düşən müharibə iştirakçısının sağ ayağı topuqdan amputasiya olundu

İşğaldan azad olunmuş Xocalı rayonunun Ulubaba kəndi ərazisində mina partlayıb.

Azərbaycan Respublikası Daxili İşlər Nazirliyi, Baş Prokurorluğu və Minatəmizləmə Agentliyinin (ANAMA) Mətbuat Xidmətlərindən Milletinsesi.info-a bildirilib ki, Ağdam rayon sakini 1963-cü il təvəllüdlü Nağı Novruz oğlu İmanov minalardan təmizlənməmiş ərazidə piyada əleyhinə minaya düşüb.

Hadisə nəticəsində Nağı İmanov ayağından xəsarət alıb.

Faktla bağlı Xocalı Rayon Prokurorluğunda araşdırma aparılır.

"ANAMA, AR DİN və Baş Prokurorluq bir daha vətəndaşları təhlükəsizlik qaydalarına riayət etməyə, mina təhlükəsi işarələrinin göstəricilərinə diqqətlə yanaşmağa və bələd olmadıqları ərazilərə daxil olmamağa çağırır!", - deyə bildirilib.

İşğaldan azad edilmiş Xocalı ərazisində mina partlayışı nəticəsində xəsarət alan Qarabağ müharibəsi iştirakçısı, "Azərbaycan Bayrağı Ordeni" ilə təltif edilmiş Nağı İmanovun sağ ayağı topuq hissəsindən amputasiya olunub.

Xəstəxanadan verilən məlumata görə, onun həyatı üçün təhlükə yoxdur.