Prezident İlham Əliyevin tapşırığına uyğun olaraq, "İşğaldan azad edilmiş ərazilərə Böyük Qayıdışa dair I Dövlət Proqramı"na əsasən, yenidən qurulan Cəbrayıl şəhərinə respublikanın müxtəlif ərazilərində yataqxana, sanatoriya və inzibati binalarda müvəqqəti məskunlaşmış ailələrdən ibarət növbəti köç karvanı Bakı şəhərinin Qaradağ rayonundan yola salınır.
MillətinSəsi.info xəbər verir ki, bu mərhələdə Cəbrayıl şəhərinə 33 ailə - 183 nəfər köçürülür.
Doğma yurda qayıdan Cəbrayıl sakinləri hərtərəfli dövlət qayğısı ilə əhatə olunduqlarına görə Prezident İlham Əliyevə və Birinci vitse-prezident Mehriban Əliyevaya təşəkkür ediblər.
Onlar, həmçinin torpaqlarımızı işğaldan azad edən rəşadətli Azərbaycan Ordusuna, qəhrəman əsgər və zabitlərimizə minnətdarlıqlarını bildirib, bu yolda canlarından keçən şəhidlərimizə rəhmət diləyiblər.
Bu gün Cəbrayıl şəhərinə köç edən keçmiş məcburi köçkün Vəliş İmaməliyev deyib ki, Cəbrayıldan çıxanda 18 yaşım var idi, indi isə 50 yaşında qayıdıram öz torpağıma.
O qeyd edib ki, şaxtalı-boranlı hava olmasın baxmayaraq, öz doğma yurduna köçmək üçün gecəni yuxusuz keçirib:
"Baxmayaraq ki, hava şaxtalıdır, yer buz bağlayıb, amma Cəbrayıla köçəcəyik deyə gecəni yatmamışam. Səhər tez çıxıb gəlmişəm ki, birdən gecikərəm. Həsrətlə öz doğma yurduma, evimə qovuşmağı gözləyirəm. Bundan gözəl nə ola bilər, bir məcburi köçkün üçün öz yurduna qovuşmaqdan gözəl bir şey varmı?
Bu günləri bizə yaşatdığı üçün Ali Baş Komandanımıza, müzəffər Ordumuza minnətdarıq. Allah şəhidlərimizə rəhmət eləsin, qazilərimizə cansağlığı versin!"
Qeyd edək ki, hazırda Qarabağda və Şərqi Zəngəzurda, oraya köçürülən keçmiş məcburi köçkünlərlə yanaşı, bu bölgədə aparılan bərpa-quruculuq layihələrin icrasında çalışan, həmçinin ayrı-ayrı dövlət qurumlarının yerli bölmələrində xidməti vəzifələrini yerinə yetirən, yenidən fəaliyyətə başlamış səhiyyə, təhsil, mədəniyyət, turizm, sənaye, energetika müəssisələrində işləyən, ümumilikdə, 40 minə yaxın insan yaşayır.
Azərbaycan dili
Русский
Deutsch
English
Türkçe
Français