Dələduzluqda təqsirli bilinərək dörd il altı aylıq həbsə məhkum edilmiş keçmiş məhkəmə hakimi Lətif Nəbiyev vaxtından əvvəl azadlığa buraxılıb.
MillətinSəsi.İnfo xəbər verir ki, bu barədə Xəzər Rayon Məhkəməsi qərar qəbul edib.
Yayılan məlumatlara görə, məhkum şəxs hökm qanuni qüvvəyə minəndən sonra zərərçəkmişlərə dəymiş ziyanı tam ödəyib, onlarla barışıq əldə edib. Bundan əlavə, cəzadan azad edilmək üçün dövlət büdcəsinə ziyanın 25 faizi qədər ödəniş də edib.
Hakim bunu nəzərə alaraq, qanunun müvafiq maddəsinə əsasən qərar verib. Qərara əsasən, Lətif Nəbiyev vaxtından əvvəl cəzaçəkmədən azad edilib. O, cəzaçəkmə müəssisəsindən azadlığa buraxılıb.
İş üzrə əsas zərərçəkmiş Azad İbrahimov sayta açıqlamasında dəymiş ziyanın ödənilmədiyini bildirib:
"Lətif Nəbiyev mənə 247 400 ABŞ dolları ziyan vurub, pulumu mənimsəyib. Məhkəmə şikayətimi qismən təmin edib. Yəni məhkəmə Lətif Nəbiyevin mənə 214 258 manat ödəməli olduğu barədə qərar çıxarıb. Xəbərləri indi gördüm, yazılıb ki, "zərərçəkmişlərə dəymiş ziyanı tam ödəyib". Zərərçəkmişlərdən biri də mənəm. Mənə bir qəpik də ödəməyib".
Əldə etdiyimiz məlumata görə, eyni iş üzrə digər zərərçəkmiş Rüstəm Abdullayevə dəymiş ziyan tam ödənilib və barışıq əldə edilib.
Qeyd edək ki, L.Nəbiyev Bakı Apellyasiya Məhkəməsinin və Suraxanı Rayon Məhkəməsinin hakimi işləyib. Bir neçə nəfərin külli miqdarda pulunu dələduzluqla ələ keçirdiyi üçün üç il əvvəl həbs edilmişdi.
