Ölkənin aparıcı dağ-mədən şirkəti olan “AzerGold” QSC Yeni il və Dünya Azərbaycanlılarının Həmrəyliyi Günü ərəfəsində daha bir xeyriyyə təşəbbüsünü həyata keçirib.
“MillətinSəsi.info” xəbər verir ki, Səhmdar Cəmiyyətin və Daşkəsən Rayon İcra Hakimiyyətinin birgə təşkilatçılığı ilə Daşkəsən rayonunun bütün kənd və qəsəbələrini əhatə edən bayram aksiyası təşkil edilib.
Aksiya çərçivəsində ilk növbədə Vətən müharibəsi şəhidləri, müharibə əlili və aztəminatlı ailələrin azyaşlı övladlarına “AzerGold” QSC-nin təşəbbüsü ilə uşaqların dağ-mədən sahəsi üzrə müxtəlif peşələrə marağının artırılması məqsədilə nəşr edilmiş “Qızıl axtarışında” adlı nağıl kitabı, müxtəlif növ şirniyyat və oyuncaqlardan ibarət boğçalar Şaxta baba obrazı tərəfindən təqdim edilib. Məqsəd azyaşlıları bayram sovqatları ilə sevindirmək, onlara xoş əhval-ruhiyyə bəxş etməkdir.
Qeyd edək ki, sözügedən aksiya “AzerGold” QSC-nin Sosial Təsir və Məsuliyyət üzrə siyasəti çərçivəsində həyata keçirilib. Səhmdar Cəmiyyətinin əsas fəaliyyət zonası olan Gəncə-Daşkəsən iqtisadi rayonunda icra edilən sosial təşəbbüslər çərçivəsində bu tip aksiyaların təşkili gələcəkdə də davam etdiriləcək.
