Ağstafanın icra başçısının adı məhkəmə qalmaqalında – 194 minlik mənimsəmə

 09-05-2024

Bakı Telefon Rabitəsi Həmkarlar İttifaqının keçmiş sədri İsrafil Bəkirov və qurumun baş mühasibi Rəşad Babayevin məhkəməsi başa çatıb.

Haqqin.az  xəbər verir ki, Rəşad Babayev 194 min manatlıq mənimsəmədə ittiham olunub.

O, 2020-ci ilin martından 2022-ci ilin iyun ayına qədər olan əmək haqqı kartına qanunsuz olaraq pul köçürüb. Təqsirləndirilən şəxsin etirafına görə, qohumu, Rabitə İşçiləri Müstəqil Həmkarlar İttifaqı Respublika Komitəsinin keçmiş sədri, hazırda Ağstafa rayon icra hakimiyyətinin başçısı olan Seymur Orucovun himayəsi ilə baş mühasib vəzifəsinə keçib. Babayev iddia edib ki, bu vəzifədə olarkən Orucovun əmrini yerinə yetirib.

Təqsirləndirilən şəxs onu da bildirib ki, proqram təminatı ilə məşğul olan Gülbəniz adlı şəxs oğlunu Rəqəmsal İnkişaf və Nəqliyyat Nazirliyinin Dövlət Radiotezliklər İdarəsində işə düzəltmək istəyib. Babayev Orucovla məsləhətləşdikdən sonra məsələni 20 min manata həll etməyə razılaşıb. Ancaq iş alınmayıb və bu, qadının narazılığına səbəb olub.

Babayev bu barədə Orucova məlumat verib. Orucov isə cavabında “narahat olmağa dəyməz” deyib:

“Ağstafa rayonuna gedib Seymur Orucovla görüşdüm. Dedim, götürdüyüm pulu qaytarmağımı tələb edirlər. Orucov məsələni həll edəcəyini vəd etdi. Bakıya qayıdandan sonra 20 min manatı toplamaq üçün maaş kartıma əlavə köçürmələr etdim”.

Cinayət Məcəlləsinin 314-cü (səhlənkarlıq) maddəsi ilə təqsirləndirilən, barəsində həbs qətimkan tədbiri seçilən qurumun baş mühasibi İsrafil Bəkirov isə özünü təqsirli bilməyib. O, Babayevin hiylələrində iştirak etmədiyini və hətta nə baş verdiyini öyrənmək üçün yoxlama aparmaq niyyətində olduğunu söyləyib. Bəkirov məhkəmədən ona bəraət verilməsini istəyib.

Rəşad Babayev 7 il müddətinə azadlıqdan məhrum edilib. İsrafil Bəkirov isə yaşayış yerini tərketmə qadağası və elektron qolbaq taxmaq şərti ilə 2 il müddətinə azadlığın məhdudlaşdırılması ilə cəzalandırılıb.

Bənzər yazılar

11.465388059616