Şimal bölgəsində tüğyan edən qasırğa, güclü külək bir sıra ciddi fəsadlar yaradıb. İki gün ərzində bölgədə yüzə yaxın yaşayış məntəqəsi işıqsız qalıb.
Güclü külək Xızıda böyük dramaturq Cəfər Cabbarlının ev muzeyinin dam örtüyünün bir hissəsini də uçurub.
Yerli sakinlərdən Bizim.Media-ya verilən məlumata görə, hazırda muzey ciddi təhlükə altındadır. Təmirdən yeni çıxmış otaqlar və bəzi eksponatlar məhv olmaq təhlükəsi ilə üz-üzədir.
C.Cabbarlı muzeyinin direktoru Həcər Rəsulova da faktı təsdiqləyib. O, muzeyin binasının təmir işlərində heç bəxtinin gətirmədiyini deyib. Bildirib ki, dam örtüyünün bir hissəsini güclü külək aparıb və hazırda imdadlarına çatacaq bir kəs yoxdur.
Məsələ ilə bağlı Xızı Rayon İcra Hakimiyyətindən hələ ki bir cavab verilməyib.
C.Cabbarlının Xızıdakı ev muzeyi barədə Bizim.Media bir neçə dəfə yazıb. Mədəniyyət Nazirliyinin başında kimin durmasından asılı olmayaraq heç bir nazir 2019-cu ildən bəri təmirə dayanan muzeyin eksponatlarının bədii tərtibat işlərini başa çatdırmaqda maraqlı olmayıb.
Xəbər verildiyi kimi, yanvarın 13-də günün ikinci yarısında əsən güclü külək ölkənin bir sıra bölgələrində fəsadlar törədib, o cümlədən elektrik xətlərinə, binaların dam örtüyünə zərər vurub.
Milletinsesi.info-ın xəbərinə görə, güclü külək Sumqayıt Regional Mədəniyyət İdarəsinin (RMİ) əhatə etdiyi Xızı rayonunda Cəfər Cabbarlının ev-muzeyinin dam örtüyünün bir hissəsini uçurub. Bundan əlavə, muzeyin binasını elektrik enerjisi ilə təmin edən xətlər qırılıb.
Hadisə baş verdikdən sonra Mədəniyyət Nazirliyi tərəfindən dərhal verilən tapşırığa əsasən Sumqayıt Regional Mədəniyyət İdarəsinin nümayəndələri tərəfindən ev-muzeyə baxış keçirilib, binaya və elektrik təsərrüfatına dəymiş zərər qiymətləndirilib.
Yanvarın 14-də muzeyə elektrik enerjisinin verilişi bərpa edilib. Binanın dam örtüyünün bərpası ilə bağlı işlərə başlanılıb.
Qeyd edək ki, görkəmli şair, dramaturq, ssenarist Cəfər Cabbarlının (1899-1934) Xızıdakı ev-muzeyi ədibin həyat yoldaşı Sona xanım Cabbarlının təşəbbüsü ilə 1956-cı ildə ictimai əsaslarla ev-muzeyi kimi fəaliyyətə başlayıb. 13 ildən sonra muzey olaraq dövlət qeydiyyatına alınıb.
