Yenilik və dəb həvəskarlarını maraqlandıran əsas suallardan biri də yeni ildə interyer dizayn sahəsində hansı dəyişikliklərin olmasıdır. Bir çox mədəniyyətlərdə yeni il ərəfəsində mənzildəki köhnə əşyalardan qurtulmaq adətinin olduğunu nəzərə alsaq, hazırda bu sualların tam yerinə düşdüyünü demək də olar.
İnteryerdə hansı lazımsız əşyalardan qurtulmağın vaxtı çatdığını bilmək üçün təkcə moda meyillərinə nəzər salmaq kifayət etmir. Həmçinin komforta uyğun olaraq da nəyin çoxdan köhnəldiyini bilmək lazımdır.
“Report” 2023-cü ildə hansı interyer üslubların dəbdə olacağını və ya trenddən çıxacağını araşdırıb.
Ölkədəki dizayn studiyalarından birinin təsisçisi Şəfiqə Həsənova bir sıra öyrəşdiyimiz mebel elementlərinin artıq tarixə qovuşacağını ehtimal edir. Bunlardan biri sürüşən qapılı klassik qarderoblardır.
“Belə qapılar artıq dəbdə deyil. Eyni zamanda, güzgülü qapıları olan sürüşən qarderoblar da dəbdən çıxıb. Qarşıdakı tendensiyalar bizi yenidən düz qapılı şkaflara qayıtmağa çağırır”, - Ş.Həsənova deyir.
O, eyni zamanda, məxmər mebelli klassik kral interyerlərin də çoxdan köhnəldiyini deyir: “Müasir dizayn tendensiyaları bizi təmtəraqlı görünüşə deyil, mebelin praktikliyinə və funksionallığına diqqət yetirməyə məcbur edir. Məxmər örtüklü "qışqıran" divanlar və puflar ekoloji cəhətdən təmiz və asan təmizlənən parça və ya dəri kimi materiallarla əvəz edilməlidir”.
Dizayner hesab edir ki, detal ayaqları olan mebel də keçmişdə qaldı:
“Bazarlarda, mebel mağazalarında, çox bahalı fabriklərin kataloqlarında qara, zərli və ağ nazik metal ayaqları olan stul, stol, şkaf, konsollar gözə dəyir. Çox vaxt istehsalçılar eyni fitinqləri alırlar. Ona görə də fantaziya fərqliliyi məhdudiyyətlərə səbəb olur”.
Məkanı arakəsmələrlə bölmək də artıq aktual deyil. Ş.Həsənova hesab edir ki, bu, xüsusilə işıq keçirməyən və məkanı vizual olaraq gizlədən sıx materiallardan hazırlanmış qaranlıq arakəsmələrə aiddir:
“Eyni şey son vaxtlara qədər ekoloji təmiz interyerin məşhur elementi olan taxta arakəsmələrə də aiddir.
Ümumiyyətlə, 2023-cü ildə interyerdə təmiz üslub axtarışından imtina etməyə dəyər. Minimalizm, klassika, loft kimi dizaynlar artıq keçmişdə qalıb. Konkret üslubu fərdiliyiniz, rahatlığınız əvəz edəcək. Bunun üçün müxtəlif dizaynlı mebel və dekoru qarışdırmaq olar. Beton divarları yumşaltmaq üçün loftun əks-sədaları, ultra müasir futuristik mebel aktual olacaq. Minimalist interyerin sahibi üçün isə 1970-80-ci illərin üslubunda mebellərin təqdimatı tanış və rahat bir şeyə çevriləcək, çünki bu, ona keçmişi xatırladacaq".
Ş.Həsənova deyir ki, ekzotik ağaclardan hazırlanmış nəhəng dəzgahlar da keçmişdə qalıb:
“Bir dövr var idi ki, dizaynerlər öz işlərində, məsələn, Afrikadan və ya İndoneziyadan gətirilən iri taxta plitələrdən istifadə edirdilər. Düzənsiz formalı bu strukturlara şəffaf doldurucu əlavə edilir və masalar hazırlanırdı. Bu yanaşma keçmişdə qalıb. İndi getdikcə daha az dizayner müştərilərinə bərk ağacdan mebel təklif edir, çünki onunla işləmək çətindir. Əvəzində MDF ilə işləmək daha asandır. Üstəlik, bu materiallar yaxşı mebelin yalnız ağacdan hazırlana biləcəyi barədə mifi dağıdır”.
Spot işıqlar populyarlığını itirmir, lakin boz çərçivədə klassik dəyirmi lampalar artıq keçmişin qalığı hesab olunur. Onları işıqlandırma üçün gizli cibləri olan tavanlarla əvəz etmək məsləhətdir.
Həmçinin, bir çox loft üslublu əşyalar kimi, hörümçək çilçıraqları da aktuallığını itirir. Funksional dəyəri olmayan çilçıraqlardakı artıq elementləri minimalist üslubda şık qapalı lampalarla əvəz etməyə dəyər, dizayner hesab edir.
