“Azərlotereya”nın küçələrdəki qumarxanaları ödənişlərə görə niyə çek vermir? – Vətəndaşlar həm aldadılır, həm də milyonlar büdcədən yayındırılır

Azərbaycanda kazino və qumar hələ mərhum prezident Heydər Əliyevin dövründən qadağan olunub. Bu qumarın təşkili məsuliyyət yaradır. Lakin “Azərlotereya” ASC Bakı küçələrini qumarxanalara çevirib.

Şəhərdə total şəkildə “Poz qazan” qumarı gedir. Paytaxtın hansı nöqtəsinə getsən, bu oyunları görmək mümkündür. Küçə ticarətinin, səyyar satışın qadağan edildiyi ölkədə “Azərlotereya” rahatlıqla öz qumar məntəqələrini qurub.

Əksər metrostansiyaların çıxışlarında, bazarlarda, müxtəlif ünvanlarda insanlar sonuncu qəpiyini də verib “Top qazan” alırlar. Əlbəttə, deyilə bilər ki, bu bir şans oyunudur, amma kuponların 80- 90 faizində uduş yoxdursa, deməli, “Azərlotereya” insanları aldadır, soyur, məqsədli şəkildə cibinə girir və sadəcə bəzi adamlar təsadüfən udurlar. Onlar da uduşa qədər dəfələrlə uduzan adamlar olur ki, itirilmiş pulun bir qismini çıxarmağa sevinirlər.

Deyilə bilər ki, bu, leqal lotereyadır, dövlət icazə verib, heç kəs də oynamağa məcbur edilmir. Lakin bir məsələ unudulur ki, ASC şəhərin bir çox ünvanlarında bu biznesi təşkil etməklə insanları oynamağa təşviq edir, şirnikləndirir. Yəni küçədə meyvə-tərəvəz satmağa icazə yoxdur, amma “Poz qazan” oynaya bilərsən.

Sözsüz ki, hər gün 10 insandan azı 5 nəfəri ayaq saxlayıb, maraqlanacaq. Amma əksəriyyəti də bu tələyə düşür, hər gün milyonlar dövr edir və qazanan məhz “Poz qazan” təşkil edənlər olur. Görəsən, küçələrdə kasıb təbəqəni bu işə təşviq və cəlb etməyin adı nədir?

Bu lotereya kuponlarının arxasında bir rəqəm var, o rəqəmlə onlar fərqlənirlər. Həmin ani lotereyaların çapını sifariş edən fiziki və ya hüquqi şəxsə məlum olur ki, hansı nömrədə hansı rəqəmin üstü bağlanıb. Yəni uduşlu lotereya kuponları əvvəlcədən sifarişçiyə məlum olur, onları istəsə götürə, istəsə götürməyə bilər və s.

Bu da istehlakçıların kütləvi surətdə aldanmasına gətirib çıxarır. Azərlotereya”nın “Poz qazan” lotereyalarında kuponların arxasında rəqəmlər var, bir-birindən fərqlənirlər və öncədən məlumdur. Kuponların üzərindən o rəqəmlər mütləq götürülməlidir.

Ən əsas məsələ isə odur ki, “Poz qazan” piştaxtalarında oturan satıcıların heç birində çek-kassa aparatları yoxdur, Vətəndaşlar tərəfindən alınan 1, 5, 10 manatlıq lotereyalara görə heç bir alıcıya çek verilmir. Bu isə vergidən yayınma deməkdir. Üstəlik, “Poz qazan” piştaxtalarında oturan satıcıların heç birinin VÖEN hesabları olmadığı, sərbəst iş kimi məşğul olduqları deyilir.

Onu da qeyd edək ki, "Azərlotereya" rəsmilərinin açıqlamasına görə, hər ay ölkəyə 60 milyon manatlıq lotereya kuponları satışa verilir və həmin lotereyalarda vətəndaşlar 38 milyonluq uduş əldə edə bilərlər. Burdan belə sual yaranır ki, hər ay azı 22 milyonluq lotereya kuponlarının taleyi necə olur? 

Mənbə reportyor.info