Gədəbəy rayonunun Çanaqçı kəndində 44 günlük Vətən müharibəsi iştirakçısı Babakişiyev İsmət Namiq oğlunun (2000-ci il təvəllüdlü) intihar etməsi iddia olunur.
MillətinSəsi.info xəbər verir ki, bu barədə sosial şəbəkələrdə məlumatlar yayılıb. Hadisə rayonun Çanaqçı kəndində baş verib.
Belə ki, kənd sakini, 2000-ci il təvəllüdlü Babakişiyev İsmət Namiq oğlu özünü asaraq intihar edib. Hadisə gecə saatlarında, İsmətin ailə üzvlərinin yuxuya getməsindən sonra baş verib.
O, bu gün Çanaqçı kəndində torpağa tapşırılıb. İntiharın hansı səbəbdən baş verdiyi hələlik məlum deyil.
Qeyd edək ki, İsmət Babakişiyev Vətən müharibəsində əsgər kimi iştirak edib. O, döyüşlərə Xüsusi Təyinatlı Qüvvələrin tərkibində qatılıb. İsmət Babakişiyev Prezidentin sərəncamları ilə Şuşanın, Füzulinin, Xocavəndin, Cəbrayılın azad olunmasına görə və "Şücaətə görə" medalları ilə təltif olunub.
Onu da əlavə edək ki, Vətən müharibəsi qazisi subay idi. Aprelin 21-də 22 yaşı tamam olacaqdı.
