Milli Məclisin iclasında “Azərbaycan Respublikasının Baş prokuroru vəzifəsinə təyin olunmasına razılıq verilməsi haqqında” məsələyə baxılıb.
Bizim.Media xəbər verir ki, Prezident İlham Əliyev Baş prokuror vəzifəsinə Azərbaycan Respublikası Baş Prokuroru Kamran Əliyevin yenidən namizədliyini irəli sürüb.
Məsələ səsverməyə çıxarılaraq qəbul edilib.
Sonra Baş prokuror Kamran Əliyev Milli Məclisdə çıxış edib. O, etimada görə Prezident İlham Əliyevə təşəkkür edib:
"Mənə yenidən etimad göstərib bu mühüm dövlət postuna təyinatımla bağlı ali qanunvericilik orqanına müraciət etdiyinə görə Prezident İlham Əliyevə öz adımdan və prokurorluq orqanlarının əməkdaşları adından təşəkkür edirəm. Həmçinin Milli Məclisin deputatlarına da namizədliyimi dəstəklədiklərinə görə təşəkkür edirəm".
“Prokurorluq haqqında” Qanuna əsasən, Azərbaycan Respublikası baş prokurorunun, hərbi prokurorunun, Naxçıvan Muxtar Respublikası prokurorunun, ərazi və ixtisaslaşdırılmış prokurorların səlahiyyət müddəti 5 ildir.
Məlumat üçün bildirək ki, Kamran Əliyev 2020-ci il mayın 1-də Prezident İlham Əliyevin Sərəncamı ilə Baş prokuror təyin edilib. 2021-ci il noyabrın 23-də ona I dərəcəli dövlət ədliyyə müşaviri ali xüsusi rütbəsi verilib.
Qeyd edək ki, Konstitusiyaya əsasən, Milli Məclis Azərbaycan Respublikasının Prezidentinin təqdimatına əsasən, Baş prokurorun vəzifəyə təyin və vəzifədən azad edilməsinə razılıq verir.
Azərbaycan dili
Русский
Deutsch
English
Türkçe
Français