“Gənc Qazilər” birliyinin sədri Hacı Vəliyev barəsində həbs qətimkan tədbiri seçilib

“Gənc Qazilər” birliyinin sədri Hacı Vəliyev Bakı Şəhər Baş Polis İdarəsinin əməkdaşları tərəfindən saxlanılıb.

Sosial mediada onun yaxınları məlumat yayıblar ki, hadisə martın 31-də gecə saatlarında baş verib.

Daxili İşlər Nazilriyi onun həbsini təsdiqləyib.

Nazirliyin məlumatına görə, Hacı Vəliyev əvvəllər barəsində Cinayət Məcəlləsinin xuliqanlıq maddəsi üzrə olan cinayət işi ilə bağlı tutulub.

H.Vəliyev şəhid ailələrini, qaziləri, müharibə iştirakçılarının prolemlərini işıqlandırması və aidiyyəti üzrə məmurları tənqid etməsi ilə tanınır.

O, martın 18-də polisin Yasamal rayonu ərazisində küçə ticarəti ilə məşğul olan bir qrup qaziyə qarşı zorakılıq tətbiq etdiyini ictimailəşdirmişdi.

Hacı Vəliyev bildirmişdi ki, Yasamal Rayon Polis İdarəsinin rəis müavini polkovnik Anar Məmmədovun göstərişi ilə qazilərin Abbas Mirzə Şərifzadə 156 ünvanında yerləşən satış yerləri dağıdılıb, özləri isə polis bölməsinə aparılıb.

“Gənc Qazilər” birliyinin sədri Hacı Vəliyev barəsində 22 gün müddətinə həbs qətimkan tədbiri seçilib.

Qərar aprelin 1-də Xətai rayon Məhkəməsi tərəfindən verilib.

Məlumatı DİN Mətbuat xidmətinin bölmə rəisi Nurlan Əliyev “Qafqazinfo”ya təsdiqləyib. O bildirib ki, Hacı Vəliyev barəsində olan cinayət işi ilə əlaqədar saxlanılıb. İstintaq hərəkətləri davam etdirilir.

Qeyd edək ki, “Gənc Qazilər Birliyi” adlı QHT dövlət qeydiyyatına alınmayıb. Hacı Vəliyev özünü qanunsuz fəaliyyət göstərən bu təşkilatın “sədr”i kimi təqdim edir.