14 il icra başçısı işləmiş Lütvəli Babayevin biznesmen oğlunun başına iş gəlib. Belə ki, Babəli Babazadənin dostu üçüncü şəxslə əlbir olaraq onun əmlaklarını 2 milyon manata sataraq, pulunu mənimsəməkdə ittiham olunur.
Qaynarinfo.az-ın məlumatına görə, 12 noyabr 2019-cu il tarixdə icra başçısı vəzifəsindən azad edilən Lütvəli Babayev elə həmin ildən Rusiyanın Novosibirsk vilayətinə köçüb.
Sabiq icra başçısı hazırda ailəsi ilə birlikdə sözügedən şəhərdə yaşayır. İki qızı və bir oğlu olan Lütvəli Babayev orda biznes fəaliyyəti ilə məşğuldur. Onun tikinti və otel biznesi var.
İqtisadiyyat üzrə fəlsəfə doktoru olan Lütvəli Babayevin Rusiyada universitetlərin birində müəllim fəaliyyəti ilə də məşğul olduğu deyilir. Onun yalnız yay aylarında dincəlmək üçün Azərbaycana gəldiyi bildirilir.
Məsələ burasındadır ki, bu hadisə baş verməzdən əvvəl B.Babayevin sahibi olduğu tikinti şirkətinin 1 milyon manat vergi borcu yaranıb. Bununla bağlı ona rəsmi məktub gəlib, verginin ödənilməli olduğu xatırladılıb. Bu məsələyə görə Babəli dostu Aruz Əliyevlə məsləhətləşib, ondan nə edə biləcəyini soruşub.
Aruz Əliyev özü isə həkim-cərrahdır. O, bu cinayətin üstü açılana kimi "Uniklinika”nın baş həkimi olub.
Aruz Əliyev
İddia olunur ki, Aruz külli miqdarda vergi borcu yaranmış Babəliyə ölkədən çıxmasının lazım olduğunu deyib. O, tanışı Ehtiram Kərimovla əlbir olaraq eks-icra başçısının oğlunun Türkiyəyə qaçmasına nail olub.
Elə əsas hadisələr də bundan sonra başlayıb...
Babəli Türkiyədə yaşadığı müddətdə Bakıdakı əmlaklarını idarə etmək üçün Aruza etibarnamə verib. O, əmlakları satışa çıxarıb. Dediyinə görə, Aruz onun etibarından sui-istifadə edib. Aruz və Ehtiram Babəlinin Binəqədi rayonunda yerləşən yarımtikilisini və Nərimanov rayonundakı əmlakını ümumilikdə 2 milyon manata satıblar. Bundan sonra həmin pulu əmlakların sahibinə vermədən dələduzluq yolu ilə şəxsi mənafelərinə sərf ediblər.
Zərərçəkmiş şəxsin şikayəti əsasında baş həkim Aruz Əliyev və Ehtiram Kərimov polis əməkdaşları tərəfindən tutulub. Onlara dələduzluq maddəsinin ən ağır bəndi ilə ittiham irəli sürülüb, hər ikisi haqda həbs qərarı verilib.
İstintaq dövründə keçmiş icra başçısı Lütvəli Babayev də dindirilib. O, cinayət işi üzrə şahid qismində tanınıb.
Təqsirləndirilən şəxslər isə ittihamları qəbul etmirlər. Onlar deyirlər ki, zərərçəkmiş əmlaklarını könüllü satdırıb, pulunu da Türkiyədə xərcləyib. İttiham olunan tərəfin iddiasına görə isə Babəli ailəsinin əmlakını satıb xərclədikdən sonra vəziyyətdən çıxmaq məqsədilə dostundan istifadə edib.
Digər məlumata görə, Babəli Türkiyəyə qaçmazdan əvvəl xırda xuliqanlığa görə 15 gün həbsdə qalıb. Buraxıldıqdan dərhal sonra isə ölkədən gedib.
Yaxın vaxtlarda bu iş üzrə məhkəmə istintaqı başlayacaq. Həm zərərçəkmiş, həm təqsirləndirilən şəxslər işin halları barədə ətraflı məlumat verəcəklər. Məhkəmə proseslərini diqqətdə saxlayacağıq.
Xatırladaq ki, Lütvəli Babayevin oğlu Babəli Babazadə atasının vəzifəsindən azad edilməsindən sonra biznesinin əsas hissəsini Rusiya paytaxtına köçürməsi ilə bağlı araşdırmaçı jurnalist Cavanşir Həsənli bir müddət öncə öz sosial şəbəkə hesabında məlumat yaymışdı.
Həmin məlumatda araşdırmaçı jurnalist Cavanşir Həsənli bildirmişdi ki,Babəli Babazadə ötən il Moskvada “Liqa-Stroy” Məhdud Məsuliyyətli Cəmiyyətini (ООО ЛИГА-СТРОЙ) 100 min rubl nizamnamə kapitalı ilə təsis edib. “Liqa-Stroy” Rusiya paytaxtında binaların inşası üçün lisenziya alıb. Şirkətin qanuni təmsilçisi Rusiya vətəndaşı Kirill Ayvenqoviç adlı şəxsdir.
Lütvəli Babayevin oğlu atası Zərdab rayon icra hakimiyyətinin başçısı vəzifəsində olarkən Azərbaycanda “BLB” Məhdud Məsuliyyətli Cəmiyyətini (Babəli Lütvəli Babazadə) təsis edib. Keçmiş icra başçısının ailəsinə məxsus daha bir şirkət – “TOP POİNT” Məhdud Məsuliyyətli Cəmiyyət 2014-cü ilin dekabrında Lütvəli Babayevin ailə üzvlərindən Rübabə Babayeva Nizami qızının adına təsis edilib. Hər iki MMC akademik Mirəli Qaşqay küçəsi ev 63A, mənzil 26 ünvanında hüquqi qeydiyyatdadır.
Qeyd edək ki, Lütvəli Babayev 2007-2019-cu illərdə Zərdab rayon, 2005-2007-ci illərdə Mingəçevir şəhər icra hakimiyyətinin başçısı olub.
