"Müharibə illərində könüllü qruplar tərəfindən yaradılan şəhid məqalələri azərbaycanlı vikipediyaçılar tərəfindən tamamilə silinib".
Bu sözləri texnobloqer Fərid Pərdəşünas sosial şəbəkə hesabında yazıb:
"Onlar buna səbəb kimi, şəhidlərin qeyri-ensiklopedik şəxslər olduğunu əsas gətiriblər.
Qlobal vikipediya fondundan heç bir istək və məhdudiyyət olmadan illərdir məqaləsi olan şəhidlər silinib. Bu birbaşa azərbaycanlı vikipediyaçıların şəxsi təşəbbüsü əsasında olub. Aylardır buna zəmin hazırlanırdı. Təsəvvür edin, Azərbaycanda adına küçə olan, illərini vətənə xidmətlə keçirən, 5 medal sahibi şəhid bu ölkə üçün qeyri-ensiklopedik adlandırılıb, vikipediyadan silinir".
Bloqer qeyd edib ki, bu işi edənlərin adlarını bilir və Baş Prokurorluğa, Dövlət Təhlükəsizliyi Xidmətinə müraciət edəcək.
Bununla bağlı AMEA-nın Mətbuat Xidmətinin yaydığı açıqlamada qeyd edilib ki, Vətən müharibəsi şəhidləri ilə bağlı "Vikipediya"da yaradılan məqalələrin silinməsi ilə Azərbaycan Milli Elmlər Akademiyasında (AMEA) fəaliyyət göstərən könüllü qrupların heç bir əlaqəsi yoxdur.
"Azərbaycanın ərazi bütövlüyü uğrunda canından keçən şəhidlərimizlə bağlı məqalələrin silinməsini düzgün olmayan, səhv addım kimi qeyd edir və buna təəssüfləndiyimizi bildiririk", - açıqlamada vurğulanıb.
