“Azərbaycan Hava Yolları” QSC (AZAL) 2020-ci ili 76 milyon 415 min manat xalis zərərlə başa vurub.
Bakupost.az səhmdar cəmiyyətinin maliyyə hesabatına istinadən xəbər verir ki, bu, 2019-cu illə müqayisədə 3 % azdır.
Bununla belə, aviaşirkətin yığılmış zərəri 4,5% artaraq 1 milyard 763 milyon 916 min manata çatıb.
2020-ci il AZAL-ın daşımalar üzrə və digər gəlirləri 335 milyon 236 min manat (2019-cu ilə nisbətən 3 dəfə az), koronavirus (COVID-19) pandemiyası ilə əlaqədar hökumətdən aldığı subsidiyalar 232 milyon 82 min manat (2019-cu ildə olmayıb), əməliyyat xərcləri 540 milyon 149 min manat (43,1% az), maliyyə xərcləri 83 milyon 966 min manat (24,5% az), xarici valyuta mübadiləsindən zərəri 9 milyon 399 min manat (42,9% çox), mənfəət vergisi ödəmələri isə 10 milyon 219 min manat (48,6% az) təşkil edib.
2021-ci il yanvarın 1-nə AZAL-ın aktivləri 1 milyard 978 milyon 200 min manat olub ki, bu da illik müqayisədə 5,1% azdır. Hesabat dövrünə aviaşirkətin öhdəlikləri 1,5% azalaraq 2 milyard 757 milyon 960 min manata düşüb, balans kapitalının çatışmazlığı isə 9% artaraq 779 milyon 760 min manata çatıb.
REAL partiyasının icra katibi, iqtisadçı Natiq Cəfərli AZAL-ın 2020-ci il üzrə maliyyə hesabatı barədə şərh verərkən bildirib ki, inhisarçı olasan, bütün uçuşlara, yerüstü xidmətlərə nəzarət edəsən, qiyməti kəllə-çarxa qaldırıb bilet satasan, amma yenə də zərərlə-ziyanla işləyəsən – söhbət yenə analoqu olmayan şirkətdən, AZAL-dan gedir.
“AZAL son maliyyə hesabatını açıqlayıb, şirkət 2020-ci ili 76 milyon 415 min manat xalis zərər ilə başa vurub, halbuki 2020-ci ildə AZAL hökumətdən COVİD-19 ilə əlaqədar olaraq 232 milyon 82 min manat subsidiya da alıb. Bundan başqa AZAL-ın 2,2 mlrd. manat borcu da var, əsas borc dövlətə, Maliyyə Nazirliyinədir, yəni, ölmüş puldur, bu vəsaiti AZAL heç qaytarmayacaq da, bir müddət sonra borclar silinəcək.
Bunun bir adı var – oğurluq, talançılıq, qeyri-effektiv idarəetmə, 44 günə işğalçılara qalib gələ bildik, 344 aydır (şirkət yaranandan bu günə) ki, bir tək AZAL-a qalib gələ bilmirik”, - ekspert qeyd edib.
Xatırladaq ki, AZAL 1992-ci ildə yaradılıb, ölkənin milli aviadaşıyıcısıdır. Onun nizamnamə kapitalı 823 milyon 974 min manatdır. Aviaşirkətin qərargahı Bakıda – Heydər Əliyev Beynəlxalq Aeroportunda yerləşir.
