“Kanal 13” Youtube kanalında Saatlı rayon sakini Elnur Rzayevin ondan rayon prokurorluğunda 5 min manat məbləğində rüşvət tələb olunması, guya aralarında razılaşdırılmış məbləği vermədiyinə görə üzr istəməsi ilə bağlı videomüraciəti yayılıb.
Saatlı rayon sakini Elnur Rzayevin videomüraciəti ilə bağlı Baş Prokurorluğun Mətbuat xidmətinin məlumat yayıb.
Məlumatda bildirilib:
“Törətdiyi cinayət əməlləri məhkəmənin qanuni qüvvəyə minmiş hökmü ilə təsdiq olunmuş Elnur Rzayevin həmin videomüraciəti ilə bağlı bildirilir ki, o, 2009-2019-cu illər ərzində Saatlı rayon Təhsil Şöbəsinin Yeni Novruzlu kənd tam orta məktəbinin direktoru işləyərkən vəzifə səlahiyyətlərindən sui-istifadə edərək büdcə vəsaitini taladığına görə Saatlı rayon prokurorluğunda Cinayət Məcəlləsinin 179.2.3, 308.1 və 313-cü maddələri ilə təqsirləndirilməsinə dair cinayət işi istintaq olunaraq 29 may 2019-cu il tarixdə baxılması üçün rayon məhkəməsinə göndərilib.
Cinayət işinə müvafiq məhkəmə instansiyalarında baxıldıqdan sonra yekun olaraq Şirvan Apelyasiya Məhkəməsinin 5 oktyabr 2022-ci il tarixli qərarı ilə Elnur Rzayevə 2 il müddətinə dövlət və yerli özünüidarə orqanlarında rəhbər və maddi-məsul vəzifə tutma hüququndan məhrum edilməklə, 8 min manat məbləğində cərimə cəzası təyin edilib.
Bundan əlavə bildirilir ki, Elnur Rzayevin Saatlı rayon prokurorluğunun əməkdaşlarının qanunsuz hərəkətləri ilə bağlı 4 may 2019, 09 oktyabr 2019 və 11 fevral 2020-ci il tarixli müraciətləri üzrə Baş Prokurorluqda araşdırma aparılıb, lakin göstərilən xüsusatlar öz təsdiqini tapmayıb.
Baş Prokurorluq tərəfindən bir daha media istifadəçilərinə müraciət edilməklə dövlət qurumunun rəsmi mövqeyini almadan bu növ məlumatların yayılmaması xahiş edilir”.
Qeyd edək ki, bir neçə il öncə də, (04 mart, 2019-cu il) Saatlı rayonu Yeni Novruzlu kənd tam orta məktəbinin direktoru olmuş Rzayev Elnur Əlisalam oğlu sosial şəbəkələr vasitəsilə baş prokurora bir müraciət ünvanlayıbmış.
Həmin vaxt “AzPolitika.info” saytının verdiyi məlumata görə, məktəb direktoru Saatlı rayon prokuroru Kamran Əhmədovun şantaj və rüşvət tələbləri ilə üz-üzə qaldığını bildirib, baş prokurordan kömək istəyib.
04 mart, 2019-cu ildə Elnur Rzayevin baş prokurora ünvanlanmış şikayət ərizəsini olduğu kimi oxuculara təqdim edirik:
“Yazib Sizə bildirirəm ki, rəhbərlik etdiyim Saatlı rayonu Yeni Novruzlu kənd tam orta məktəbində 7 nəfər ibtidai sinif müəllimi, 4 sinif komplekti var. Müəllim sıxlığı ilə əlaqədar dərs bölgüsündə çətinliklər yaranır. Eyni zamanda mövcüd təlimata əsasən, müəllimlərin dərs yükü onların Diaqnostik qiymətləndirmə nəticələrinə uyğun bölünməlidir.
Tədris ilinin əvvəlində, təlimat nəzərə alınmaqla, müəllimlər arasında dərs bölgüsü aparmışdıq. Lakin Saatlı rayon prokuroru Kamran Əhmədov cənabları məni çağıraraq bildirdi ki, sizin məktəbdə mənim qohumum var, onun dərs yükünü artırın.
Mən vəziyyəti izah etməyə çalışdım ki, bizdə müəllim sıxlığı var. Keçən il prokurorun tapşırığı ilə həmin müəllim 32 saat dərs apardığı halda digər müəllim 6 saata işləyirdi. Təbii ki, bu da həm pedaqoji kollektiv, həm də ictimaiyyət arasında narazılığa səbəb olurdu. Bu il də həmin narazılıq olmasın deyə müəllimlər arasında bərabər dərs bölgüsü aparmağa çalışdım. Lakin yenə də məni prokurorluğa çağırıb, “Səni həbs edərəm, digər direktora söz dedim eləmədi və ona 11 il iş verdirdim, səni də onun gününə salacam” kimi, şantaj xarakterli sözlər söylədi.
Sonra məndən 5 min manat pul istədilər. Mən də bildirdim ki, imkanım yoxdur və o pulu verə bilmərəm. Bundan sonra guya məktəbdən digər bir müəllim dərs bölgüsü ilə əlaqədar prokurorluğa müraciət etdi. Kamran Əhmədov cənabları yenə də məni çağırıb rəhbərlik etdiyim müəllimlərin yanında “sən cinayətkarsan, yerində deyilsən, səni türmə gözləyir” kimi sözlərlə öz işçilərimin yanında məni təhqir elədi. Həmin müəllimin ərizəsinə əsasən ilkin araşdırma aparıldı.
Müəllimlərin və şagirdlərin izahatı alındı. Ancaq izahat verməyə gedən müəllimlər bildirdilər ki, orada bizə təzyiq edirdilər ki, izahatı direktorun əleyhinə verin, onsuz da onu tutacağıq. İlkin araşdırma zamanı həm müəllimlərin izahatı, həm şagirdlərin izahatı, həm də Saatlı RTŞ-nin izahatı alındı və prokurorluğun gözlədiyi qanunsuzluqlar üzə çıxmadı. Təbii ki, bununla razılaşmadılar.
Yenə də məni çağırdılar ki, o pulu verməsən Maliyyə Nazirliyindən yoxlama çağırıb, sənin 7 illik fəaliyyətini yoxlayıb tutacağıq. Mən də bildirdim ki, göndərin, mən heç bir qanunsuz iş tutmamışam ki, məni tutalar. Ancaq prokuror bildirdi ki, onsuz da yoxlama gələndə onların qalmağı, yemək pulu və s. kimi xərclər səndən çıxacaq, elə o pulu ver bizə göndərməyək.
Həmin vaxt Baş Prokuroluğun qəbul şöbəsinə gəldim, orada bir xanım prokuror (adını bilmədim) məni qəbul elədi və məsələni ətraflı şəkildə şifahi olaraq ona danışdım. O isə bildirdi ki, inanmıram bir rayon prokuroru pul almaqdan ötrü belə bir varianta əl atsın. Əgər belə bir şey olarsa, onda Siz yazılı şəkildə müraciət edərsiniz, məsələni araşdırarıq…
Sonra Maliyyə Nazirliyinin Dövlət Maliyyə Nəzarəti Xidmətinin müfəttişləri tərəfində məktəbdə yoxlama aparıldı. Yoxlamağa gələn müfəttişlər çox qərəzli idilər. Mən bunun səbəbini soruşanda onlar qeyd etdilər ki, biz bura Kamran Əhmədovun tapşırıqı ilə gəlmişik və nəsə tapmalıyıq.
Beləliklə, müəllimlərin və şagirdlərin izahatı alındı. Sonra məlum oldu ki, dərsdənkənar məşğələlərin araşdırılması zamanı şagirdlərə tamam başqa suallar verilib, lakin izahatları başqa cür yazdırılıb. Sonra məktəbdə mövcud olan fizika və kimya laboratoriyalarının avadanlıqla guya tam təchiz olunmamasını əsas gətirərək, guya mən qəsdən dövlət əmlakını talamışam deyə cinayət işi başlamaqla, məni hədələməyə başladılar. Halbuki, laborant öz izahatında qeyd edib ki, o, vaxtı-vaxtında işə gəlib və əmək haqqını da özü alıb.
Onu da qeyd etməliyəm ki, məktəbə yoxlama göndərilməsi barədə qərar qəbul edilməsinə baxmayaraq, həmin qərarın surəti mənə göndərilmədi.
Məni narahat edən bu yoxlama deyil. Lakin bir rayon prokurorunun bu vəziyyətə düşməsi, məqsədli şəkildə yoxlama göndərib, “ya pul verməlisən, ya da tutulacaqsan” deməsidir ki, məncə bu – Cənab Prezidentimizin qeyd etdiyi kimi, dövlətimizə qarşı xəyanətdir!
Mümkünsə bu yoxlama yenidən komissiya şəklində gəlsin və bu komissiyanın tərkibində həm Təhsil Nazirliyinin, həm Maliyyə Nazirliyinin, həm də prokurorluğun nümayəndəsi olsun. Çünki belə olan halda prokuroluğun qərəzli mövqeyini müdafiə edən bir nəfərin yoxlama aparmasındansa komissiyanın yoxlaması daha obyektiv olar.
İndi mənim bir çıxış yolum qalıb ki, belə şantajla işləməkdənsə hansısa xarici ölkədən sığınacaq istəyim və köçüm gedim. Belə məmurlarınn əlindən bu ölkədə nə işləmək mümkündür, nə də yaşamaq…”
Qeyd edək ki, Təhsil Nazirliyinin İctimaiyyətlə əlaqələr şöbəsinin rəhbəri Cəsarət Valehov Elnur Rzayevin şikayətinin xüsusi qaydada araşdırılacağını bildirib.
Saatlı Rayon Prokurorluğunun və şəxsən Kamran Əhmədovun mövqeyini işıqlandırmağa hazırıq.
