“Azərbaycanda standartlara görə yumurtaların üzərinə vurulan kodlar istehsalçı müəssisədə avtomatik rejimdə vurulur. Bu kodlar istehsal tarixini və müəssisəni göstərir”.
Bu sözləri jurnalistlərə açıqlamasında baş baytarlıq müfəttişi, AQTA-nın şöbə müdiri Qalib Əbdüləliyev son günlər cəmiyyətdə narahatlığa səbəb olan yumurtalar üzərindəki kodlar barədə suala cavab verərkən deyib.
O bildirib ki, yumurtanın üzərinə əlavə kodların vurulması üçün tələb yoxdur:
“Hansısa istehsalçı öz müştərisinin tələbinə uyğun olaraq yumurtanın üzərinə hər hansısa məlumat əlavə edə bilər. Amma bunun ümumi qida təhlükəsizliyi nəzarətinə heç bir aidiyyəti yoxdur. Bunun heç bir konvensiyaya aidiyyəti yoxdur. Yumurta üzərindəki tələb olunan məlumat istehsal olunan tarixin və müəssisənin qeyd edilməsidir. Buna da səbəb bizim qida təhlükəsizliyini izləməyimizdir. Bu gün dünyada xüsusi təhlükəli və izlənilən 6 xəstəlik var. Bu xəstəliklərin azad statusu alması üçün Ümumdünya Heyvan Sağlamlığı Təşkilatı tərəfindən təsdiqlənməlidir”.
O bildirib ki, ölkəmizdə bu xəstəliklərdən ikisi üzərində - dabaq və xırdabuynuzlu heyvanların arasında taun xəstəliyi üzərində işlər aparırıq: “Amma digər xəstəliklərdən olan quş qripi ilə bağlı mövsümdən asılı olaraq daim monitorinq aparılır. Eləcə də digər təsərrüfat əhəmiyyətli xəstəliklərə qarşı müəyyən intensiv tədbirlər görülür”.
