Mədəniyyət Nazirliyi yanında Mədəni İrsin Qorunması, İnkişafı və Bərpası Xidmətinin Şabran regional idarəsinin rəisi Sabit Qurbanov və Salyan Regional İdarəsinin rəisi Babək Bəkirov öz ərizələri ilə işdən azad ediliblər.
Bizim.media xəbər verir ki, iki idarə rəisinin öz ərizələri ilə işdən getməsinin bir neçə səbəbi var.
Bunlar - qurum tərəfindən ərazilərdə mədəni irsi öyrənmək üçün lazımi şəraitin yaradılmaması, maaşların azlığı, xidməti avtomobillərin olmaması, yanacağın verilməməsi kimi səbəblərdir.
Şabran Regional İdarəsinin sabiq rəisi Sabit Qurbanov öz ərizəsi ilə işdən getməsini təsdiqləyib. Lakin o, səbəblər barədə danışmaq istəməyib.
Bundan başqa, Mədəni İrsin Qorunması, İnkişafı və Bərpası Xidmətinin nəzarət şöbəsinin rəisi Ruslan Ənvərlinin maliyyə sektorunun aparıcı məsləhətçisi Taleh Nəbiyevin və abidə mühafizəçisi Elcan Hüseynəliyevin də öz ərizələri ilə işdən getdikləri bildirilir.
Mədəni İrsin Qorunması, İnkişafı və Bərpası Xidmətinin mətbuat katibi Fariz Hüseynli məsələ barədə məlumat veriləcəyini bildirib.
Məsələ ilə bağlı Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti Bizim.media-nın sorğusuna cavab verib.
Bildirilib ki, məlumatda qeyd olunan məsələlər həqiqəti əks etdirmir:
“Həmin şəxslər öz ərizələri ilə işdən ayrılıblar. Qeyd olunan digər məsələlər isə həqiqəti əks etdirmir”.
Xatırladaq ki, işdən ayrılan şəxslər səbəb kimi qurum tərəfindən ərazilərdə mədəni irsi öyrənmək üçün lazımi şəraitin yaradılmamasını, maaşların azlığını, xidməti avtomobillərin olmamasını, yanacağın verilməməsini bildirmişdilər.
