Azərbaycanın Bosniya və Herseqovinadakı səfiri Vilayət Quliyev futbol üzrə milli komandamız barədə xatirəsini bölüşüb.
O, özünün “Facebook” hesabında 2005-ci ildə Polşaya 0:8 hesablı məğlubiyyətdən sonra təyyarədə gördüklərini paylaşıb.
“Azərbaycan millisindən düz 18 il bundan əvvəl, 2005-ci il martın 26-da Varşavada keçirilən Polşa-Azərbaycan matçından sonra əlimi üzmüşəm. Həmin oyunda 0:8 hesabı ilə məğlub olduq. VIP-lojada Polşanın müdafiə naziri Şmaydanovski ilə yanaşı oturmuşduq (2010-cu ildə prezident L.Kaçinski ilə birlikdə təyyarə qəzasında həlak oldu). Qapımıza ikinci qol vurulandan sonra çiynimə toxunub: “Bu, futboldur. Hər dəqiqə hər şey dəyişə bilər”, - dedi. Dördüncü qol vurulanda isə: “Futbol boş şeydir. Əsas odur ki, sevgidə və müharibədə uduzmayasan”, - deyib ürək-dirək verdi. Sonrakı qollar vurulanda daha heç nə demədi. Deyəsən, o da oyuna görə xəcalət çəkirdi.
Komandanı Varşavaya gətirən çarter reysilə mən də bir neçə günlüyə Bakıya qayıtdım. Təyyarədə futbolçuları müşahidə etmək çox maraqlı idi. Elə bil, 0:8 uduzan onlar deyildilər. Həvəslə yeyib-içirdilər. Uduzduqları oyundan başqa hər şeydən - dolların kursundan, polyak qızlarından, nə aldıqlarından danışırdılar. Yanaşı oturduğumuz məşqçi isə guya özünə haqq qazandırırmış kimi: “Uduzacağımızı bilirdim. Amma daha belə hesabla yox”, - dedi. Uduzmaq əhvali-ruhiyyəsi ilə gələn komanda, təbii ki, qələbə qazana bilməz. Niyə uduzduğunu özünə dərd eləmirsənsə, səbəblərini axtarmırsansa, növbəti oyunlarda da məğlubiyyətə məhkumsan... Futbol həm də vətənpərvərlik, milli təəssübkeşlik tələb edir...” - deyə V.Quliyev qeyd edib.
