Azərbaycan Milli Elmlər Akademiyasının (AMEA) Arxeologiya, Etnoqrafiya və Antropologiya İnstitutunun sabiq əməkdaşları tarixçi alim Səbuhi Hüseynov və həyat yoldaşı Gülüstan İsayeva cinayət məsuliyyətinə cəlb olunub.
APA.az xəbər verir ki, Səbuhi Hüseynov vəzifəsindən sui-istifadə edərək Qarabağın işğaldan azad olunmuş ərazilərində tədqiqat aparılması üçün ayrılmış külli miqdarda vəsaiti mənimsəyib.
İddia olunur ki, cinayət əməlində ona İnstitutun kadrlar şöbəsinin müdiri işləmiş həyat yoldaşı Gülüstan İsayeva köməklik göstərib.
Təqsirləndirilən şəxslər ümumilikdə 92 min manat mənimsəmədə ittiham olunur.
Baş Prokuror yanında Korrupsiyaya qarşı Mübarizə Baş İdarəsi tərəfindən Səbuhi Hüseynov və Gülüstan İsayeva barəsində Cinayət Məcəlləsinin 179.3.2 (külli miqdarda mənimsəmə) və 308.2 (vəzifə səlahiyyətlərindən sui-istifadə) maddələri ilə cinayət işi başlanıb. Onların hər ikisi barəsində məhkəməyə qədər həbslə bağlı olmayan qətimkan tədbiri seçilib.
Təqsirləndirilən şəxslər ittihamları qəbul etmirlər. Hazırda Azərbaycan Milli Elmlər Akademiyasının Abbasqulu Ağa Bakıxanov adına Tarix İnstitutunda baş mütəxəssis işləyən Səbuhi Hüseynovun dediyinə görə, həyat yoldaşı ilə birlikdə uzun müddət Arxeologiya, Etnoqrafiya və Antropologiya İnstitutunda işləyib.
O, institutda yalnız elmi işçi kimi fəaliyyət göstərdiyini, heç bir vəzifə sahibi olmadığını bildirir. Səbuhi Hüseynov özünün və həyat yoldaşının verilmiş ittihamlarla əlaqələri olmadığını, istintaqa hərtərəfli ifadə verdiyini qeyd edib.
Səbuhi Hüseynov məsələ ilə bağlı açıqlama yayıb.
O bildirib ki, AMEA Arxeologiya, Etnoqrafiya və Antropologiya İnstitutunun baş hüquqşünası Fəxrəddin Gözəlovun onlara şər atır:
“AMEA Arxeologiya, Etnoqrafiya və Antropologiya İnstitutunun baş hüquqşünası Fəxrəddin Gözəlov yalan danışaraq guya ekspedisiya üzvlərinin imzalarında mənim və həyat yoldaşım Gülüstan İsayevanın imzaları olduğunu bildirir. Bildirirəm ki, bu ağ yalanı Fəxrəddin Gözəlov hüquqşünas olmağına baxmayaraq mətbuatda bildirib. Ekspertizaya göndərilmiş imza nümunələrinin heç birində nə mənim, nə də həyat yoldaşımın imzaları çıxmayıb. Hamısı ekspertlər tərəfindən yoxlanılıb. Bu ekspert rəyi məndə də var. Bu hüquqşünas bilə-bilə yalan məlumat verir və ən əsası istintaqda olan məlumat, qarşı, yəni şikayətçi tərəf tərəfində necə əldə edilib, bu necə olub? Axı, istintaq gizli aparılır”.
“Digər tərəfdən diqqət edin. İnstitutun hüquqşünası bildirir ki, yoxlama nəticəsində Gülüstan İsayevaya təklif edilib ki, daha yüksək vəzifə keçsin. Lakin Gülüstan İsayeva imtina edib. Bax, AMEA-da əsl reallıq budur. Adama deyərlər, əgər “cinayət” edibsə, niyə daha yüksək vəzifəyə keçirirsiz?”, - deyə Səbuhi Hüseynov bildirib.
Qeyd edək ki, cinayət işi üzrə ibtidai istintaq başa çataraq baxılması üçün Bakı Ağır Cinayətlər Məhkəməsinə göndərilib. İş hakim Azad Məcidovun sədrliyi ilə araşdırılacaq.
