“Bu gün apardığımız müzakirə enerji bazarlarının qlobal səviyyədə dəyişməsi şəraitində baş tutur. Qlobal artım risk altındadır. Enerji təhlükəsizliyi isə bizi düşündürən birinci məsələdir”.
AZƏRTAC xəbər verir ki, bu fikri Avropa İttifaqının energetika məsələləri üzrə komissarı xanım Kadri Simson fevralın 3-də Bakıda Cənub Qaz Dəhlizi Məşvərət Şurası çərçivəsində keçirilən nazirlərin 9-cu və Yaşıl Enerji Məşvərət Şurası çərçivəsində nazirlərin 1-ci iclaslarında çıxışında deyib.
“Bu səbəbdən bu gün Məşvərət şuralarının toplantıları mühüm fürsət hesab olunur. Bu göstərir ki, Avropa İttifaqı, Azərbaycan və tərəfdaş ölkələr enerji təhlükəsizliyinin və bazarda sabitliyin təmin edilməsində birgə çalışırlar. Qarşıdakı müddətdə Azərbaycanın qaz təchizatının həcmini iki dəfəyə qədər artırmasını gözləyirik”.
K.Simson bildirib ki, biz düşünürük ki bunu etmək çox da çətin deyil: “Bu texniki baxımdan çətin deyil. Çünki biri var yeni kəmər çəkəsən, biri də var ki, mövcud kəmərin imkanlarını daha da genişləndirəsən. Hesab edirəm ki, Azərbaycan bunu bacaracaq”.
