Masaj salonları ilə bağlı ictimai rəy birmənalı deyil. Bu gün masaj salonu ilə bağlı kimə sual versən, beş adamdan ən azı üçünün üzündə təbəssüm, kinayə yaranır.
Dəfələrlə sosial şəbəkələrdə, eləcə də zaman-zaman redaksiyamıza daxil olan müraciətlərdə masaj salonları ilə bağlı şikayətlər səsləndirilib. İnsanlar bildirirlər ki, bu salonlar reabilitasiya, tibbi xidmət göstərilməsi adı ilə açılsa da, sonradan fəaliyyət istiqamətləri dəyişir, intim xidmət axtarışında olanların üz tutduqları məkana çevrilir.
Masaj qiymətləri isə 15 manatdan başlayır, 50-60 manata qədər artır. Qiymət fərqi rəqabət mühiti üçün zəmin yaratsa da, insanlarda gerçəkdən reabilitasiya məqsədilə fəaliyyət göstərən müəssisələrə inam itir. Hətta tibb müəssisəsində işləyən bir çox şəxslər dost-tanışlarına masajçı olduqlarını deməkdən çəkinir, özlərini tibb işçisi, texniki işçi kimi təqdim edirlər.
Təəssüf ki, bu gün elə bir vəziyyət yaranıb ki, həqiqətən, masaj üçün bu ünvanlara üz tutanlara heç kəs inanmır. Əksəriyyət elə düşünür ki, masaj salonlarına gedənlərin məqsədi ehtiraslarını təmin etməkdir.
Maraqlıdır, bu obyektlərin fəaliyyətinə hansı qurum, hansı meyarlar əsasında lisenziya verir? Lisenziya verməklə iş bitir, yoxsa nəzarət mexanizmi mövcuddur?
Lisenziya ilə bağlı məsələyə aydınlıq gətirən Analitik Ekspertiza Mərkəzindən (AEM) sorğumuza cavab olaraq bildirilib ki, tibbi xidmətlər adı altında fəaliyyət göstərən ayrıca masaj salonuna onlar tərəfindən heç bir lisenziya verilmir:
“Biz yalnız özəl tibb mərkəzlərinin müraciəti əsasında lisenziya məsələsinə baxırıq. Belə ki, onlar müraciət edirlər ki, özəl tibb müəssisəsində fizioterapiya şöbəsinin nəzdində müalicəvi masaj xidməti göstərmək istəyirlər. Bu halda tərəfimizdən klinika tərkibində bu xidmətin göstərilməsinə lisenziya verilir.
Ayrıca olaraq, Çin təbabəti və ya başqa hər hansı bənzər formada fəaliyyətə lisenziya verilməsi bizim səlahiyyətimizdə deyil. Dövlət müəssisələrində göstərilən bu tip xidmətlər də bizim nəzarətimizdə və səlahiyyətimizdə deyil. Yalnız özəl tibb müəssisələrinin müraciətlərinə baxılır.
O ki qaldı özəl tibb müəssisəsində masaj xidmətinin göstərilməsinə dair nəzarətə, bunu da özümüz həyata keçiririk. Belə ki, tibbi masaj fəaliyyəti göstərən özəl tibb müəssisələrində iki növ – planlı və plansız yoxlamalar aparılır. Planlı yoxlamalar ilin əvvəlində tərtib olunan müəyyən qrafik əsasında həyata keçirilir. Plansız yoxlamalar isə daxil olan vətəndaş şikayəti, hüquq-mühafizə orqanları tərəfindən irəli sürülən şikayətlər və ya mətbuatda hər hansı özəl klinika tərkibində masaj xidməti ilə bağlı ciddi neqativ hallar barədə məlumatlar yayılarsa, o zaman aparılır”.
Məsələ ilə bağlı hüquqşünas Şamil Paşayev Oxu.Az-a açıqlamasında bildirib ki, ümumilikdə masaj fəaliyyətinin lisenziyalaşdırılmamış xidmət olduğunu nəzərə almaq lazımdır:
“İnsanlar VÖEN ilə və ya hüquqi şəxs kimi bu xidməti göstərən müəssisələr aça bilərlər. Ümumiyyətlə, ölkədə peşəkar masaj xidməti göstərən müəssisələr var. İstər reabilitasiya məqsədli, istər tibbi masaj, istərsə də alternativ tibb kimi masaj xidmətlərinin təqdim edilməsi mövcuddur. Lakin masaj xidməti altında əxlaqsızlıq yuvalarının fəaliyyəti, intim xidmətlərin göstərilməsi də heç kəsə sirr deyil.
Bununla mübarizə aparmağın effektiv yolu yoxdur. Təbii ki, hüquq-mühafizə orqanlarının əxlaqsızlıq yuvası kimi fəaliyyət göstərən, fahişələri bir araya toplamaqla intim xidmət göstərən müəssisələr barədə tədbir görmək səlahiyyətləri var. Bu, cinayətdir və Cinayət Məcəlləsinin müvafiq maddələri ilə məsuliyyət yaradır. Odur ki, hüquq-mühafizə orqanları bu kimi əxlaqsızlıq yuvası saxlayan şəxsləri məsuliyyətə cəlb edə bilərlər.
Lakin əxlaqsızlıq yuvasında göstərilən xidmətlərdən yararlanan kişiləri heç bir məsuliyyət gözləmir. Fahişə xidməti göstərənlər isə qanunla 100 manat məbləğində cərimə olunurlar. Yəni bu şəxslərdən heç biri cinayət məsuliyyəti daşımır”.
Ş.Paşayev onu da əlavə edib ki, Azərbaycanda intim xidmətlərin göstərilməsi bir çox başqa ölkələrdə olduğu kimi leqal deyil:
“Fahişəxanaların yaradılmasına qanun icazə vermədiyi üçün bu fəaliyyət leqal deyil və insanlar bu məsələdə gizli fəaliyyət göstərirlər. Müxtəlif adlar altında – masaj salonu, reabilitasiya şöbəsi, müxtəlif təbabət, təlimlər adı altında fahişəlik xidmətlərinin göstərilməsini müşahidə edə bilirik. Bu barədə zaman-zaman mətbuatda, eləcə də güc strukturlarının keçirdikləri reydlər zamanı ictimailəşdirilən informasiyalar görürük. Konkret masaj xidmətləri ilə bağlı salonlardan şikayət olarsa, narazılıq olarsa, bu kimi yerlərin müəyyən olunması və mübarizə aparmaq mümkün ola bilər.
Bir başqa məqam odur ki, “masaj xidməti” göstərən bir çox insanlar var ki, onlar salonda deyil, birbaşa evlərə gedərək işləyirlər. Bu şəxslərin evlərdə hansı işlərlə məşğul olduqlarını və ya hansı xidmətləri göstərdiklərini bilmək də mümkün deyil. Bu formada kiminsə məsuliyyətə cəlb edilməsi praktikada yoxdur, mümkün deyil.
Ona görə də düşünürəm ki, nə qədər ki cəmiyyətdə “seks” və “qadağa” sözləri yanaşı işlənəcək, Şərq ölkələrində masaj xidmətləri adı altında intim, seks xidmətlərinin göstərilməsi davam edəcək. Bununla da konkret mübarizə aparmaq, ləğv etmək, kökünü kəsmək olmayacaq. Nə qədər cəmiyyət var, intim münasibətlər olacaq və bu proseslər davam edəcək. Sadəcə olaraq, intim xidmətlərin qanuni olmadığı müddətcə bu cür hallarla qarşılacağıq”.
