"Oleq Bakinskiy ləqəbi ilə tanınan kriminal avtoritet Oleq Krapivin Bakı sakinidir, veteranlar arasında sərbəst güləş üzrə Azərbaycan və SSRİ çempionu olub. Ukraynada bizneslə məşğuldur, 2013-cü ildə "Fokus jurnalı onun adını Ukraynanın 100 ən varlı şəxslərindən biri siyahısına daxil etmişdi.
Azərbaycan vətəndaşı Ağayev Davud Şahəddin oğlunun 3 iyul 2018-ci il tarixdə Kiyev şəhərində odlu silahla qəsdən öldürülməsi faktı ilə bağlı Ukraynanın istintaq qurumunda başlanmış cinayət işi 21.10.2020-ci il tarixdə istintaqın davam etdirilməsi üçün Azərbaycan Respublikasının Baş Prokurorluğuna göndərilib.
MillətinSəsi.info xəbər verir ki, bu barədə Baş Prokurorluğun yaydığı məlumatda bildirilib.
Məlumata görə, aparılmış istintaq tədbirləri ilə Azərbaycan Respublikasının vətəndaşı Həsənov Yasin Teymur oğlunun yaşadığı Kiyev şəhərində aralarında şəxsi münaqişə zəminində baş vermiş və uzun müddət ərzində davam etmiş mübahisə ilə əlaqədar Davud Ağayevi qəsdən öldürməklə ondan qisas almaq məqsədi ilə 03.07.2018-ci il tarixdə tanışı Xəlilov Valeh Zaman oğlu və istintaqa məlum olmayan qeyriləri ilə qabaqcadan əlbir olan bir qrup şəxs halında 9 mm kalibrli tapança ilə silahlanıb Davud Ağayevin restorandan çıxması barədə məlumatı əldə etdikdən sonra həmin ünvana gəlib Kiyev şəhəri, Bolşaya Vasilkovskaya küçəsində Davud Ağayevə yaxınlaşıb yaxın məsafədən bədəninin müxtəlif nahiyələrinə bir neçə dəfə atəş açaraq onu qəsdən öldürməsinə, daha sonra isə əlbir olduğu şəxslərlə birlikdə gəldikləri avtomobillə hadisə yerindən qaçmasına dair əsaslı şübhələr müəyyən edilib.
28.10.2021-ci il tarixdə Yasin Həsənova Baş Prokurorluğun İstintaq idarəsində Cinayət Məcəlləsinin 12.1, 120.2.1-ci (qabaqcadan əlbir olan bir qrup şəxs tərəfindən adam öldürmə) maddələri ilə yekun ittiham elan olunmaqla barəsində məhkəmənin qərarı ilə həbs qətimkan tədbiri seçilib.
Cinayət işi üzrə istintaq tamamlanaraq aidiyyəti üzrə baxılması üçün Bakı Ağır Cinayətlər Məhkəməsinə göndərilib.
Bundan başqa, Valeh Xəlilov və qrupun digər istintaqla müəyyən edilməyən üzvləri barəsində cinayət işi ayrılmaqla hazırda istintaq davam etdirilir.
Qeyd edək ki, Ukrayna KİV-lərinin yaydığı məlumata görə, üç il əvvəl Ağayev Davud Şahəddin oğlunun adı sui-qəsd işində keçib. 2015-ci ildə Kiyevdə azərbaycanlı biznesmenə atəş açılıb, güllələr onun ayağından dəyib. Bu vaxt biznesmenə qəsd, yaxud oğurlanacağı haqda əvvəlcədən məlumat alan xüsusi təyinatlılar, "Alfa dəstəsinin döyüşçüləri killerləri tutmaq üçün təqib başladıb. Həmin əməliyyatda Bakı sakini Ağayev Davud Şahəddin oğlu da saxlanılıb. Onun üzərindən "Kalaşnikov avtomatı və tapança tapılıb. Amma necə olubsa sonradan onu azadlığa buraxıblar.
