“Qafqazda sülhü bərqərar etmək üçün Türkiyə olaraq bütün qüvvəmizlə Azərbaycanı dəstəkləyirik”.
“Report”un məlumatına görə, bunu Türkiyənin milli müdafiə naziri Hulusi Akar Türkiyə Prezident Administrasiyasının Milli Kitabxanasında Azərbaycan Prezidenti İlham Əliyevə həsr olunmuş “Vətən müharibəsi tarixi: Şəxsiyyət faktoru” kitabının təqdimat mərasimində bildirib.
H.Akar deyib ki, türkün gücünü dünyaya göstərən Azərbaycan ordusuna bundan sonra da kimsənin yan baxmasına imkan verməyəcəyik.
“Prezidentimiz Rəcəb Tayyib Ərdoğan ən yüksək kürsülərdən “Azərbaycan yalnız deyildir”, - dedi. Bundan sonra hər iki prezidentimizin əzmi ilə möhtəşəm qələbəyə imza atıldı. Şuşa bəyannaməsi ilə Türkiyə və Azərbaycanın əbədi dostluğuna imza atılıb. Biz savaşmaq üçün deyil, savaşın qarşısını almaq üçün varıq”, - nazir vurğulayıb.
“Azad olunmuş ərazilərin minalardan təmizlənməsində Azərbaycana dəstək verməyə hazırıq. Biz savaşmaq üçün deyil, savaşın qarşısını almaq üçün varıq. Əgər Ermənistan Azərbaycanın uzatdığı barış əlini tutarsa, regionda sülh bərqərar olar, biz də bunun tərəfdarıyıq”, - Hulusi Akar qeyd edib.
Azərbaycanın savaşının haqlı olduğunu hər yerdə nümayiş etdirməyin vacibliyini deyən nazir vurğulayıb ki, başda NATO platformaları olmaqla bütün beynəlxalq tədbirlərdə bu, səsləndirilir.
