Qarabağda çalışan fəhlələr Şuşadakı etiraz aksiyasına cəlb olunub.
Bu barədə Meydan TV-nin hadisə yerindən hazırladığı sujetdə deyilir.
Sujetdə jurnalistlə özünü “Azərenerji” ASC-nin əməkdaşı kimi təqdim edən şəxs arasında belə bir dialoq yaşanıb:
- Harada işləyirsiniz?
- “Azərenerji”də işləyirik.
- Burada yaşayırsınız?
- Hə, yaşayırıq.
- Aksiyaya gəlmisiniz, tələbiniz, istəyiniz nədir?
Xatırladaq ki, dekabrın 14-də Şuşa-Xankəndi yolunda çəkiliş aparmaq istəyən “Meydan TV”nin reportyorları Bakıya geri qaytarılıb. Məsələ ilə bağlı açıqlama verən DİN-in Mətbuat Xidmətindən bildirilib ki, jurnalistlər icazələri olmadığına görə geri qaytarılıblar, saxlanılanlar yoxdur.
Qeyd edək ki, dekabrın 12-də səhər saatlarından bir qrup qeyri-hökumət təşkilatı nümayəndəsi, media təmsilçisi və ictimai fəal Rusiya sülhməramlılarının müvəqqəti nəzarətində olan Şuşa-Xankəndi yolunu bağlayıb.
Aksiya iştirakçıları Azərbaycanın faydalı qazıntı yataqları, xüsusilə Qızılbulaq qızıl və Dəmirli mis-molibden yataqlarının qanunsuz istismarına etiraz etdiklərini söyləyərək Xocalı və Xankəndi tərəfə keçmək istəsələr də, sülhməramlı kontingent onlara imkan verməyib.
Sözügedən aksiyanın dördüncü günü tamamlanmaqdadır və hazırda da davam edir.
