Vəhdət Partiyasının Nəsimi rayon təşkilatının sədri Ağalar Cavadov
Azərbaycan siyasi sisteminin son onilliklərdə keçdiyi yol, həm modernləşmə, həm də keçmişin ağır mirasından azad olma mübarizəsidir. Bu mübarizənin ən diqqətçəkən məqamlarından biri dövlətin içində illərlə möhkəmlənmiş köhnə dairələrin, öz şəxsi ambisiyalarını dövlət maraqlarından üstün tutan fiqurların yaratdığı təxribatların səhnədən silinməsi prosesidir. Bu prosesdə zaman-zaman adı ən çox çəkilən şəxs Ramiz Mehdiyev olur.
Onun uzun illər ərzində formalaşdırdığı təsir dairələri, qapalı əlaqələr sistemi və bu sistemin siyasi proseslərə kölgə salan davranışları tədricən öz mahiyyətini daha aydın şəkildə göstərməyə başladı.
Ramiz Mehdiyevin son dövrlərdə gündəmə gələn bağ evində keçirdiyi gizli toplantılar, köhnə kadr şəbəkələrini yenidən hərəkətə gətirmək cəhdləri və bunun arxasında dayanan ambisiyalar artıq təkcə siyasi intriqanın mövzusu deyil.
İctimai müzakirələrdə bu toplantıların məqsədinin hakimiyyətə təzyiq göstərmək, dövlət rəhbərliyinin atdığı islahat addımlarından narazı qalan dairələri nümayəndəlik masası ətrafında toplamaq və hətta müəyyən çevrələr tərəfindən dövlət çevrilişi üçün zəmin yaratmaq kimi təqdim olunması, məsələnin mahiyyətini daha da dramatik edir. Bu iddialar rəsmi təsdiqini tapmasa da, onların ortaya çıxması belə illərlə gizli şəkildə formalaşdırılmış paralel güc mərkəzlərinin real mövcudluğunu göstərir.
Maraqlı məqam odur ki, bu iddialar fonunda Ramiz Mehdiyevin adının radikal müxalifət lideri Əli Kərimli ilə eyni çəkilməsi yeni bir siyasi xəttin hüdudlarını müəyyən edir. Əgər siyasi sistemdə dəyişiklikləri qəbul etməyən köhnə elita ilə uzun illərdir radikal çağırışlarla siyasi sabitliyi pozmağa çalışan bir müxalifət liderinin maraqları müəyyən nöqtədə üst-üstə düşürsə, bu artıq şəxsi ambisiya deyil, dövlətçiliyə qarşı yönələn potensial təhlükə kimi dəyərləndirilir.
Analitiklər bu oxşarlıqların sistemli şəkildə təsadüf etmədiyini bildirirlər. Köhnə elita təsir imkanlarını itirdikcə radikallaşır, radikal müxalifət isə boş qalan yerlərdə tərəfdaş axtarırdı. Nəticədə Azərbaycan üçün iki fərqli, lakin eyni məqsədə yönəlmiş təhlükəli xətt formalaşırdı – daxili sabitliyin sarsıdılması.
Bu cür gizli planların formalaşması barədə yayılan versiyaların kökündə bir səbəb dayanır: dövlət idarəetməsində baş verən köklü islahatlar.
Prezident İlham Əliyevin son illərdə apardığı siyasi kurs köhnə məmur qruplarının təsir imkanlarını minimuma endirdi. Məhz buna görə daxilən bu islahatları qəbul etməyən çevrələr müxtəlif vasitələrlə siyasi sistemdə gərginlik yaratmağa çalışdı. Bu gərginliyin radikal müxalifətlə kəsişməsi isə dövlətçiliyə qarşı ikiqat zərbə ehtimalı doğururdu.
Reallıq isə ondan ibarətdir ki, Azərbaycan köhnə qapalı dairələrin oyuncağı olan dövlət deyil.
Ölkənin siyasi həyatı xalqın mandatına əsaslanan güclü liderlik və modern dövlət idarəçiliyinin üzərində dayanır.
Prezident İlham Əliyevin apardığı kadr islahatları, paralel strukturların dağıdılması, idarəetmədə şəffaflığın artırılması və dövlət maraqlarının şəxsi ambisiyalara qurban verilməsinə son qoyması bu gün Azərbaycanı regionun ən sabit ölkəsinə çevirib. Bu proses köhnə elita üçün sarsıdıcı, dövlət üçün isə xilasverici oldu.
Məhz bu səbəbdən bağ evlərində keçirilən gizli toplantılar, köhnə komanda üzvlərinin qaranlıq planları, radikal müxalifətlə güman edilən əlaqələr və hakimiyyətə qarşı yönəlmiş mümkün təxribatlar cəmiyyətdə haqlı narazılıq doğurur. Xalq yaxşı bilir ki, dövlət çevrilişi cəhdləri heç vaxt “demokratiya” adıyla gəlmir — onlar həmişə kölgədən, qaranlıq masaların arxasından, şəxsi ambisiyanın dövlət maraqlarına qələbə çalmasını arzulayanların içindən doğur.
Bu gün Azərbaycan belə planlardan qat-qat güclüdür. Dövlət idarəçiliyi köhnə intriqaların deyil, yeni siyasi iradənin üzərində qurulur. İlham Əliyevin kursu ölkəni xaosa yox, inkişaf və sabitliyə aparır. Köhnə şəbəkələrin bütün gizli cəhdləri isə gec-tez tarixin arxivində “iflas etmiş planlar” kimi qalmağa məhkumdur. Dövlətin taleyi bağ evlərində deyil, xalqın iradəsində həll olunur və Azərbaycan bu iradə ilə gələcəyini daha da möhkəm qurur.
