Bakıda yaşıllıqların miqdarı artırılacaq

Bakıda yaşıllıqların miqdarı artırılacaq
17:56 09-06-2021 | icon 168

Ekologiya və Təbii Sərvətlər Nazirliyi son günlər sosial şəbəkələrdə geniş yayılan və “Boz Bakı”, “Ağacsız Bakı” başlığı ilə paylaşılan fotoya münasibət bildirib.

Nazir müavini Vüqar Kərimov bildirib ki, sosial şəbəkələrdə yayılan şəkil çəkilən zaman şəhərin hansısa bir hissəsi götürülüb:

“Şəhərin mərkəzi hissələrində binaların sıx olması ilə yaşıllıqlar az görülə bilər. Növbəti dövrlərdə də nazirlik tərəfindən yaşıllıqların artırılması prioritet sahələrindən biridir. Bakı şəhəri və Abşeron rayonu yerləşdiyi mövqeyə görə yaşıllıqların az olduğu yarımsəhra ərazisidir.

Burada yaşıllıqların salınması, onlara qulluq məsələsi xüsusi diqqət tələb edir. XX əsrin əvvəllərində Bakı şəhəri ərazisində yaşıllıqların miqdarı ümumi ərazi ilə nisbətdə heç bir faiz də deyildi.

Hazırda həyətyanı sahələrdəki yaşıllıqları nəzərə alınmadan Bakı şəhərinin yeddi faizdən yuxarı hissəsi yaşıllıq ərazidir. Ümumiyyətlə, Azərbaycan meşə örtüyünün zənginliyi baxımından nisbətən zəif ölkələrdən sayılır. Ərazimizin cəmi 12 faizə yaxın hissəsi meşə örtüyü ilə əhatə olunub”.

Nazir müavini qeyd edib ki, son illər yaşıllıqların miqdarı artırılıb:

“Bakı şəhərində parklar, yaşıllıqlar salınıb. Bir məsələni qeyd edim ki, Bakının Qaradağ ərazisi çox böyükdür, amma orada yaşıllıqların miqdarı 1,3 faizdir. Suraxanı, Xəzər rayonları yaşıllıqların miqdarı ən çox olan ərazidir. Yasamal və Səbail rayonu ərazisi balaca olsa da, yaşıllıqlar çoxdur.

Növbəti dövrlərdə Bakı şəhərində yaşıllıqların miqdarının daha da artırılması, 15 faizə kimi çatdırılması ilə bağlı planlar var və təkliflər hazırlanır. 2020-2025-ci illərdə Abşeron rayonu üzrə yaşıllıqların daha 5 min hektara artırılması ilə bağlı təkliflər işlənilir.

Burada hər şeyi dövlətdən gözləmək düzgün deyil. Özəl sektor da buna dəstək olmalıdır. Bakıda aqro bağların salınması yaşıllıqların artmasına gətirib çıxarır. Bu layihələr davam etdiriləcək”.

“2018-ci ildə qəbul edilən qərara əsasən, yaşıllıqların qeydiyyatı rayonlar üzrə icra hakimiyyəti orqanları tərəfindən aparmalıdır. Bu qeydiyyatlar lazımi keyfiyyətdə aparılmır”.

Ekologiya və təbii sərvətlər nazirinin müavini Vüqar Kərimovun sözlərinə görə, icra hakimiyyəti orqanları tərəfindən tək-tək hallarda yaşıllıqlarla bağlı qeydiyyat aparılır: “Nazirlik olaraq biz burada tənzimləyici, əlaqələndirici koordinasiya işini həyata keçiririk”.

Nazir müavini bildirib ki, paytaxt ərazisində hansısa bir köhnə binalar sökülürsə, orada yenisi tikilən zaman yaşıllıqların qurulması ilə bağlı işlər görülür:

“Həmin ərazidən qəzalı vəziyyətdə olan ağaclar götürülübsə, daha yaxşı qoyulur. Hər bir tikilən binanın ərazisində 25 faiz yaşıllıq olmalıdır. Yaşıllıqları qorumaq lazımdır, bizim işimiz də budur.

Biz yaşıllıqların qorunması üçün əlimizdən gələni edirik, amma bir neqativ hal daha çox qınağa səbəb olur. Bu da düzgündür. İstəyirik ki, bizə də, ağacı da kəsənlərə də ictimai nəzarət olsun. Həmin nəzarət bizə ən böyük köməkdir”.

V.Kərimov əlavə edib ki, dövlət əhəmiyyətli tikililər olan zaman yolların genişləndirilməsində ağaclar götürülür:

“Biz oradan ağacların kəsilməsinə yox, köçürülməsinə üstünlük veririk. Yeni ərazilərdə bitmə şansı az olsa da, ağacların köçürülməsini təmin edirik. Yaşı 15, boyu üç metrə yaxın, gövdəsinin diametri 10-15 santimetrə çatan ağacları köçürürük və 75-80 faizin üzərində bizdə köçürülən ağaclar bitir”. 




0.30351305007935