Çingiz Hüseynzadə: “Olimpiya Oyunlarının təxirə salınması idmançılarımızı ruhdan salmamalıdır"

Çingiz Hüseynzadə: “Olimpiya Oyunlarının təxirə salınması idmançılarımızı ruhdan salmamalıdır"
14:28 25-03-2020 | icon 130

“Tokio-2020 Yay Olimpiya Oyunlarının təxirə salınması milli komandamızı ruhdan salmamalıdır”.

milletinsesi.info-ın xəbərinə görə, bunu Azərbaycan Milli Olimpiya Komitəsinin (MOK) vitse-prezidenti Çingiz Huseynzadə çalışdığı qurumun mətbuat xidmətinə bildirib.

Beynəlxalq Olimpiya Komitəsi (BOK) dünən koronavirus pandemiyası səbəbindən Tokio-2020 Yay Olimpiya Oyunları və Paralimpiya Oyunlarının 2021-ci ilə keçirilməsi barədə qərar qəbul etdi.

BOK-un bu qərarını şərh edən Ç.Hüseynzadə bildirib ki, Tokio-2020 Yay Olimpiya Oyunlarının 2021-ci ilə keçirilməsi milli komandamızı ruhdan salmamalıdır:

“Təbii ki, vacib olan atletlərimizin sağlamlığıdır. İdmançılarımızın oyunlarda iştirak əzminin yüksək olduğu bir şəraitdə BOK-un bu qərarı verməsi onların ruh yüksəkliyinə və hazırlıqları daha böyük inamla davam etdirmələrinə mane olmayacaq.

İndi gələcəyə, irəliyə doğru baxmaq lazımdır. Azərbaycan dövləti, bütün dünya ölkələri koronavirus infeksiyasının yayılmasına qarşı mübarizə aparır və əminəm ki, bu fədakar mübarizədə bəşəriyyət qalib gələcək”.

Ç.Hüseynzadə qeyd edib ki, MOK Azərbaycan Respublikası Prezidentinin rəhbərliyi altında koronavirus pandemiyasının yayılmasının qarşısının alınması istiqamətində aparılan fəaliyyəti dəstəkləyir və öz işini reallaşdırılan bu fəaliyyətin məcrasında davam etdirməyi planlaşdırır.

“Güman edirəm ki, insanlığın koronavirus pandemiyası ilə mübarizəsi qarşıdakı həftələr ərzində öz müsbət nəticələrini verəcək, tezliklə həyat normal axarına dönəcək”, - sözləri ilə MOK vitse-prezidenti Çingiz Hüseynzadə fikrini tamamlayıb.

Səbuhi Musayev