Lənkəranlı deputatın məlumat lövhəsində “gizli kod” – Foto/Dosye

Lənkəranlı deputatın məlumat lövhəsində “gizli kod” – Foto/Dosye
12:46 12-06-2018 | icon 305

 Lənkəranlıların deputat sarıdan heç bəxti gətirməyib. Sorğu keçirin, bir lənkəranlı seçici xatırlamaz ki, nə vaxt millət vəkili onlarla görüşə gəlib.

► Lövhədəki heroqliflər…

Deputat Hadı Rəcəbli haqda əlavə təsvirə və şərhə ehtiyac yoxdur. Onu təkcə lənkəranlı seçicilər deyil, cəmi azərbaycanlılar tanıyırlar.

Şəhərin ikinci deputatı isə Rüfət Quliyevdir. Onun da “European Tobacco-Baku” ASC-də tütün biznesinə başı o qədər qarışıb ki, Lənkəranda qoyulan məlumat lövhəsində məlumat yazmaq yadından çıxıb.

AzEuroNews.com xəbər verir ki, feysbukda paylaşılan fotodan görünür ki, R.Quliyev analoqsuz yeniliyə imza atıb.

Biznesmen deputatın məlumat lövhəsində o qədər şifrəli, gizli kodlar, Qobustan qayalarında belə görünməmiş hərflər var ki, məlumatı oxumaq üçün gərək “Tarixi Nadiri” yarıya qədər mütaliə edəsən.

Belıə ki, R.Quliyev öz fəaliyyəti barədə seçicilərinə məlumat vermək üçün xüsusi “məlumat guşəsi” yaradıb. Sadəcə fəaliyyət olmadığından, məlumat da yoxdur…

Ya da biz biçarələr anlaya bilmirik. Ola bilsin ki, daş kitabələrdə, heloqriflərdə, qədim əlifbada bu lövhədəki mübhəmin şifrələrinin açması var. Nə deyəsən, bizimkilərin təəccübləndirmək istedadı tükənmir.

► Kiyevin professoru

R.Quliyev elə-belədeputat deyil. O, III, IV və V çağırış Azərbaycan Respublikasının Milli Məclisinin deputatı, İqtisadi siyasət komitəsinin üzvüdür.

MDB Parlamentlərarası Assambleyasının siyasi məsələlər və beynəlxalq əməkdaşlıq Daimi komissiyasının sədr müavini, GUAM-ın Elm, Mədəniyyət və Təhsil üzrə Komitəsinin üzvüdür.

İqtisad elmləri doktoru, professor, Azərbaycan Texniki Universitetinin kafedra müdiri, Taras Şevçenko adına Kiyev Milli Universitetinin professorudur.

Azərbaycan Respublikası Prezidenti yanında Ali Attestasiya Komissiyasının İqtisadiyyat bölməsinin Ekspert Şurasının üzvüdür.

► YAP-çı deyil, 300 elmi əsəri var…

300-ə yaxın elmi əsər və məqalənin (o cümlədən 7 monoqrafiya, 4 dərslik, 3 broşüra) müəllifidir və onlardan 41-i ABŞ, Türkiyə, Rusiya, Ukrayna, Çexiya, Slovakiya, Latviya, Estoniya, Qazaxıstan, İsveç və digər ölkələrin nüfuzlu elmi jurnallarında çap olunub.

Görəsən, bütün bunları necə sığışdırıb çatdıra bilib? 300 elmi əsəri dünya alimləri də yazmayıb.

Maraqlıdır ki, R.Quliyev bitərəfdir, yəni YAP-a üzv olmayıb. Hər halda vikipedik məlumatda belə qeyd olunub. Azərbaycan, ingilis və rus dillərini isə mükəmməl bilir. İnanılmazdır.

► İt-pişik yemi və sələmçilik

Və son bir xatırlatmanı yada salmaq zəruridir. 300 elmi əsərin müəllifi olan professor deputat mətbuatda tütün biznesindən əlavə sələmçi kimi ad çıxarıb.

2011-ci ildə deputat it-pişikləri üçün yem alarkən iş adamı Namiq Səfərovla tanış olub. Bu tanışlıqdan sonra N.Səfərov deputatın itlərinə Avropadan 1-2 dəfə pulsuz yem gətirib.

Günlərin birində söhbət əsnasında iş adamı biznesini böyütmək üçün pul axtardığını deputata deyib.

Deputat bir neçə ayın içində 10 faizlə iş adamına 81 min 850 dollar verib. N.Səfərovla imzalanan müqavilələrə görə deputat 2011-ci ilin oktyabrından pulların faizini almalı olub.

2011-ci ilin oktyabrında N.Səfərov deputata bildirib ki, faizləri ondan almasa, həmin faizləri də əsas borc məbləğinə – 81 min 850 dollara əlavə edib ona faizlərə görə də faiz ödəyəcək. Deputat bu təkliflə dərhal, tərəddüdsüz razılaşıb.

Növbəti dəfə deputata faizin ödənilməsi vaxtı çatanda N.Səfərov digər biznes sahəsinə pul yatırdığını, Bolqarıstandan ölkəyə xüsusi təyinatlı geyimlər gətirəcəklərini söyləyib.

Təklif edib ki, deputata verdiyi pulların faizləri əsas məbləğə əlavə olunmuş hesab etsin, həmin pulların faizlərini də hesablayıb alacağı faizlər kimi nəzərində saxlasın. Deputat bu təklifə də yox deməyib, tərəddüdsüz razılaşıb.

2014-cü ilin əvvəllərindən başlayaraq devalvasiya söhbətlərini, bankların kredit verilməsində problemlərin yarandığını eşidən deputat N.Səfərovdan pullarını təcili olaraq geri qaytarmasını tələb edib.

► İş adamının ölümü və…

İş adamı isə deputata deyib ki, pulları onun razılığına əsasən dövriyyəyə buraxıb, bu səbəbdən də onun tələbini yerinə yetirə bilmir. Tərəflər arasında yaranan narazılıq münasibətlərin korlanmasına səbəb olur.

Faizləri ödəyə bilməyən iş adamı isə vəziyyətdən çıxış yolu axtardığı bir vaxtda, 2015-ci ilin aprelində  qəfildən dünyasını dəyişib.

Bundan sonra deputat faiz davasını mərhum iş adamının yaxınlarına qarşı açıb. Məhkəməyə müraciət edərək mərhum N.Səfərovun ailəsindən pullarını, pullara hesablanan faizləri geri tələb etməyə başlayıb.

Məsələ 2016-cı ilin bu günlərinə qədər uzanıb və deputat Səbayel Rayon Məhkəməsinə üz tutub.

Vəssalam, deputatın Lənkərandakı məlumat lövhəsində bu fəaliyyəti haqda məlumatlar olmasa da, mətbu lövhəsində açıq-aydın var.

Hörmətli deputatın müsahibəsini dərc etməyə çalışacağıq.