"Sovetski"də sonuncu evlər mübarizəni davam etdirir, ancaq...

'Sovetski'də qalan sonuncu evlər
"Dünəndən "Sovetski”dəki hələ sökülməmiş evlərə gedən işıq xətləri kəsilib. Qaz çoxdan kəsilmişdi, elektriklə isinirdik, indi o da yoxdur”.

Millətinsəsi.info bildirir ki, Yasamal rayonu, Abdulla Şaiq küçəsinin (Sovetski) sakinləri AzadlıqRadiosu-na düşdükləri durumdan danışırlar.

Dekabrın 26-dan küçədəki azı 15 mənzilin işığı kəsilib. Sakinlərin deməsinə görə, işıq xətlərinin kəsilməsi şəxsən icra hakimiyyəti başçısının göstərişidir. Onlarsa qışın ortasında azyaşlıların, qocaların, xəstələrin qəsdən soyuqda saxlanmasına etiraz edirlər. Rəhimə Sadıqova:

"Başçının bu hərəkəti insanlığa sığmır. Uşağa evin içində iki əlcəyi üst-üstə geydirmişəm. Paltoya, üstündən də ədyala bükmüşəm. Ayaq barmaqları donub, bu gün məktəbə göndərməmişəm. Ətrafımız açıqlıqdır, hər yeri söküblər, dörd tərəfdən külək, şaxta... Evlərimizin bir hissəsini ağır texnikalarla vurub qəzalı vəziyyətə salıblar. Göz görə-görə qocanı, uşağı soyuqdan dondurmaqla nə əldə edirlər? 81 yaşlı xəstə anamın naləsi göyə çıxıb. Ayıb deyil? Bu nalələrin ardından burda nə tikəcəklər, nə xeyir götürəcəklər?”

Digər sakin Şamil Cəbiyev deyir, işıq xətlərini kəsərkən onlara bildirilib ki, söküntü yerində işlək işıq xətləri qəzaya səbəb ola bilər. Ancaq sonra başqa səbəb söylənib:

"Dedi, ‘texnikalar işləyir, elektrik xətlərini zədələyirlər, yanğın olar, qalarsız içəridə, yanarsız, məhv olarsız’. Sonra da dedi, ‘gedin başçıya deyin, onun tapşırığıdır’”.

Yasamal rayon icra hakimiyyətindən AzadlıqRadiosu-na bildirilib ki, Abdulla Şaiq küçəsində kommunal xidmətlərin dayandırılması ərazidəki söküntüylə əlaqədardır:

"Həmin ərazidə yaşayan sakinlərə çoxdan xəbərdarlıq olunub ki, mənzillərə kommunal xidmətlər dayandırılacaq. Bu gün də onlara verilən kompensasiyanı götürüb evdən çıxmaq təklif olunur. İşlər də onlara görə ləngiyir”.

Sakinlər evlərindən çıxmamaqlarını müxtəlif səbəblərlə bağlayırlar. Bir qisim sakini kompensasiyanın məbləği qane etmir, bir qisim sakin əlavə tikililərə və həyətyanı sahələrə görə ödəniş hesablanmamasıyla razılaşmır. Bir qisim sakinsə ümumi mülkiyyət olan evlərə görə kompensasiyaların ədalətli bölünmədiyini bildirir.

Xəbərin vaxtı: 27-12-2016
Oxunma sayı: 361

Loading...
loading...

Bu bölməyə aid digər xəbərlər: